Sugilanon Ni Tita Linda

Tita Linda Belayro

Madrasta

"Basta madrasta – Kontrabida!!!
Raya rong pagpati ni Loida, solo nga onga ni Don Geronimo. Nag – asawa si Don Geronimo pagka matay ko anang asawa, ina ni Loida agud may maga alila ag maga tatap kana.
Indi mabaton ni Loida ro batang madrasta nga si Lumeng maskin mabuot pa imaw. Halin si Lumeng sa pamilyang kubos ag relihiyosa pa. Tanan hay guin obra ni Loida agod maghalin si Lumeng. Anang guina singgitan, guina sarhan it golpe ro puertahan ag kon anu-ano pa rona agud maakig kana ag dayon humalin sa andang baeay.
Ro malisod pa hay guin pabangdan pa nga may ibang eaeaki si Lumeng. Guin obrahan ni Loida it sueat nga mana hay halin kay kon sin-o nga eaeaki ag gina padaea sa anang ama, Don Geronimo nga idto sa ibang nasyon. Ogaling, tanan hay guina toeon eamang ni Lumeng tongod guina higugma it abu nana si Don Geronimo ag naeo-oy pa imaw kay Loida.
Nagdaeaga si Loida nga sunod tanan ro anang gusto. Permeng may kasadyahan sa andang baeay kaibahan ko anang mga barkada. Na-agahan sanda permi sa pag ininom, pagsinigarilyo ag pagkinanta it mabaskog. Sa owa magbuhay, umuli si Don Geronimo halin sa ibang nasyon. Hakibot imaw sa anang hakita. Guin basoe nana si Lumeng ham-an it guin pasugtan si Loida. Naila si Loida ko natabo. Ogaling imbis nga maghalin si Lumeng mas nga guin hugot nana ro anang pagtatap sa onga nga "spoiled".
Ko gabi-i ngaron, matapos ro andang gimiks nag oeoli eon ro anang barkada. Guina hawiran kunta sanda ni Lumeng nga ona eon lang mag-eobog ogaling nagpilit guid sanda nga mag – oli. Napilitan nga maghatod si Loida. Bangud madanlog ro daeanon tongod sa pag inoean, naaksidente sanda. Hadanlog si Loida ag guin daea sa hospital. Fifty-fifty ro kondisyon ni Loida. Kinahangean ro dugo para kana agud mabuhi. Sa kon anong swerte, nagka parehas ro dugo ni Lumeng ag Loida, ngani eagi-eagi guin himo ro blood transfusion, ro dugo halin kay Lumeng. Naka salbar ro daeaga. Sa anang pagmukeat hakita nana si Lumeng nga toeog pa ag naka-angot ro tubo nga may dugo nga naga tayon kana halin kay Lumeng. Nagbaskog eon si Loida, busa nag guwa sa hospital ag dungan nga nag-oli sanda. Halin kato, nagbag-o ro pagtan-aw ni Loida kay Lumeng. Matam-is man nga pamati-an ro pagtawag nga "Nanay" kay Lumeng.
Makaron indi eon magpalibog si Don Geronimo sa anang negosyo. Kon amat, guinadaea nana ro mag-ina sa ibang nasyon agod mag bisita sa andang negosyo. Malipayon si Don Geronimo nga sa anang pagpinanaw hay may naga atipan sa anang onga nga isaeang ka babaye, bilang pangaywang ina, si Lumeng. /MP