Magatao it kolor sa Hunyo 21 sa
Suno man sa Secretariat head it KAMB nga si Herbert Tavares, sa Hunyo 21, alas dos it hapon sa Pastrana Park hay may una nga gintaea-id nga parlor games sa mga inunga para mataw-an man sanda it kasadyahan eabi eon gid ro mga tradisyonal nga mga pahampang tongod masyado eon nga na-impluwensyahan ro mga inunga it mga ginatawag nga cybergames o computer-based internet games.
Ro mga masadyang hampang kamana it paborita eating contest, sack race, soft drink drinking contest, hitting the pot, pabitin, gaw-gaw blowing contest, musical chairs, trip to Jerusalem, bring me 10, ag cheek to cheek hay gina-ekspektar nga magatao it kasadya sa mga unga.
Dugang pa sa nasambit nga mga aktibidades hay ro “Boxing Sa Pastrana Park” it mga inunga sa alas tres sa nasambit nga adlaw nga igamanehar it Amateur Boxing Association of the Philippines, Aklan Chapter nga may waeo nga three-round preliminary bouts, isaeang four-round supporting main event ag ro pang ulihi hay ro four-round main event.
Samtang sa Hunyo 24, 2008 alas nwebe it agahon sa Bougainvilla Beach hay may una man nga naga kasari-sari nga parlor games daea eon ro palo-sebo para sa mga teenagers.
Nasadyahan man si Mayor Raymar A. Rebaldo sa mga aktibidades para sa mga inunga bangud nakita ko alkalde nga masyadong hanangda sanda sa mga computer games ag naduduea eon ro mga tradisyunal nga pahampang it Pilipino.
Bankathon Sa Kapyestahan It San Juan
Maga pamugsay eon man ro mga bankero sa pagselebrar sa kaadlawan it kapye-stahan ni Señor San Juan. Pagahiwatun sa Martes, Hunyo 24, 2008 sa alas otso it agahon, nga gintawag nga bankathon. Maga-halin ro karera it mga baroto sa Lambingan Beach sa barangay Andagaw paadto sa barangay Mabilo ag pabalik sa barangay Caano.
Bukas sa tanan nga mga Akeanon ro Bankathon. Kinahangean man lang hay daywang ka mga manugbugsay para magpartisipar. Sanda ra mismo ro magadaea it andang baroto nga para sa daywang ka tawo nga may katig pati man ro bugsay.
Ro premyo sa mga magadaea-og hay ro mga masunod, first prize, P3,000; second Prize, P2,000; ag third prize, P1,000. May tatlo man nga consolation prize nga tig P500.
Ro mga interesadong magpartisipar, mag-parehistro eamang sa taeatapan it Kalibo Ati-Atihan Management Board sa munisipyo it Kalibo parabil mag-abot ro adlaw o sa adlaw mismo it Hunyo 23. Kara man pagahiwaton ro pag tao it numero it mga partisipantes.
Ro nasambit nga paindis-indis para sa mga manugbugsay hay isaeang ka tradisyunal nga aktibidades it lokal nga gobyerno it banwang Kalibo nga nag-umpisa pa sa administrasyon ni dating Mayor Allen Quimpo ag sa makaron hay ginapadayon ni Mayor Raymar A. Rebaldo. Raya hay nasandig gihapon sa pagtao it importansya sa patag it turismo ag ro haega it sakripisyo it aton nga mga mangingisda.
Ginapangunahan ro aktibidades ngara it Kalibo Ati-Atihan Management Board bilang isaea sa mga tourism-related nga mga akti-bidades nga gina-manehar it nasambit nga taeatapan eaban pa sa selebrasyon it Kalibo Sto. Niño Ati-Atihan festival kada Enero. /MP
No comments:
Post a Comment