Sugilanon Ni Tita Linda

Tita Linda Belayro

Bulalakaw

Guinapatihan ko mga katigueangan nga ro bulalakaw hay isaea kunong ka pispis. Kon makita sa kaeangitan, naga wasiwas ro anang kaeayo, ag kon sin-o ro matamaan, kon bukon it sunog hay abong paso ro anang maaguman sa kaeawasan.

Sa kamatuoran, ro bulalakaw hay “falling stars” o mga meteors nga natipik sa ibang bituon o planeta nga maeapit sa atong “Earth”. May una nga maintok ag may maeagko man nga meteor. Ro mga maintok hay natutunaw eagi sa kahanginan parabil tumugpa iya sa atong planeta.

Sa lugar nanday Lonton, may nahueog nga bulalakaw. Naga pungko imaw sa andang balkonahe kat may nahueog nga bulalakaw. Tumugpa maeapit sa andang baeay. Pagkaaga, guin adtonan nana ro lugar ag hakita nana ro sunog nga mga halimunon nga guin tugpaan it bulalakaw. Guin tandaan nana ag guin tabunan it mga dahon agod balikan sa gabii nga owa it makakita.

Sa pihak nga baryo, may isaeang ka panday nga naga obra it mga espada, sanduko ag mga aradong saesaeon. Si Atong ro tawag kana. Guinpatawag si Atong it hari agod magpaobra it espada. Nag obra imaw it espada ogaling permeng naga kapute o kundi naga ka bingaw kon samitan. Tongod sa pirming naga ka bingaw, ko olihi, naakig eon ro hari. Kon indi imaw maka obra it mayad-ayad nga espada, paga pugutan imaw it oeo. Nag abot si Linoy, isaeang ka parokyano ni Atong sa pandayan agod magpapoeo ko anang sanduko. Haabutan nana nga masubo ro panday.

Naeo-oy guid imaw sa panday, ngani nag-oli imaw sa anda ag guin sakay sa anang anwang ro bato nga guin sueod sa kostal. Nag umpiza it pag obra ro panday sa bulig man ni Lonton. Pagkatapos ko espada, guin daea nana sa Hari. Pagkakita ko hari, hakibot imaw nga owa it eabot nga mataeum pa, makinang–kinang ag mayad ro pagkapanday.

Guin taw-an it kwarta ro panday. Guin taw-an man nana si Lonton. Ro panday guin taw-an nana si Lonton. Ro panday hay may onga nga daeaga. Nagpakasae sanda ni Lonton. Halin kato, si Tonton ro nagabulig sa panday ag guin obra nga opisyal nga panday it kaharian si Atong. Pagkamatay ni Atong, si Lonton ro nagboeos kana bilang opisyal nga panday it kaharian. /MP