Sugilanon Ni Tita Linda

Ni Tita Linda Belayro

Alien

Ro planetang X-Lur hay masyadong gutok. Busa, nag-osoy ro mga tawo it maestahan. Dugang pa basi ano man nga oras hay masamad ro andang planeta. Nakita nanda ro isaeang ka berde nga planeta, ro planet Earth. Nagpadaea sanda it sugo agud discubrehon kon anong klase nga planeta ag kon sarang nga maistahan it mga taga planetang X-Lur. Mas-yadong moderno ag progresibo ro taga X-Lur ngani madali nanda haabot ro planetang Earth. Idto sanda tumugpa sa Cordillera Mt. Range. Andang guin tago ro andang spaceship sa mataas nga bukid nga owa it tawo. Nagpatindog sanda it antenna para sa pag paniid. Idto masa-yuran ro pagpangabuhi adlaw-adlaw it mga tawo sa earth. May mga onga sa kalye nga nagawinarang ag owa nagaadto sa eskwelahan. May mga tatay sa sugaean, nanay sa tong-itan, ro mga dalagita ag binatilyo hay idto sa discohan, ag ro ibang mga inonga hay naga babad sa computer games.
Sumueod ro mga Aliens sa kada computer. Guin higop nanda ro paino-ino ko mga onga. Ko olihi, haeos sanda hay nakasueod sa mga inonga, daeaga ag mga magueang. Pag-oli ko mga onga sa andang baeay, nag-iba eot-a ro andang batasan, nangin mapili eot-a it pagkaon. Kon indi pagtaw-an ko andang guina pangayo hay naga pangasa ag naga sokoe sa ginikanan. Hilig nanda ro puro matam-is ag owa naga kaon it tinoea kundi puro karne, baboy ag mga junk foods. Owa man sanda naila magpaligos; owa naga ilis it eambong ag owa naga panipilyo it ngipon. Ro mga binata hay mainiton it oeo ag naga paeatyan sa sangkurot nga bagay.
Nagkabaeaka ro mga ginikanan. Isaeang ka siyentista nga guin tun-an nana ro tanan. Hakita nana nga mas abo ro mga onga nga naga babad sa computer games ag owa naga adto sa eskwelahan agud mag aeam. Nagpasa it ordinansa ro Sang-guniang Bayan nga ipag bawae ro mag hampang sa computeran. Hakita man it mga doctor sa medisina nga nag-euya ro eawas it mga onga tongod indi eon sanda makakaon ag ro iba hay naga panakaw agud ihampang. Nagnaba ro kita it computer hasta ro iba hay nagsara. Ratong mga guin suyop ro paino-ino it mga onga hay nagbalik sa normal. Nagbulig man ro eskwelahan, ro simba-han ag gobiyerno. Ro mga nanay hay guinpilit nga pakan-on it tinoea ag isda, prutas ag itlog ro mga onga. Sanda man hay guin papaligos ag guin pailis it eambong.
Ka’t indi eon makatakud ro mga Aliens tongod puro eon matambok ag limpyo ro mga tawo, nagbalik eon lang sanda sa andang spaceship sa Cordillera agod mag-uli sa planetang X-Lur.
Tongod kara, guin patihan nga mas maaeam gali ro mga taga planetang Earth. Indi tanan masakop ro paino-ino it tawo. Eabaw sa tanan, indi sanda makatakod sa kalimpyo it mga tawo. Sanda abi sa andang planeta hay owa nagapaligos ag owa naga kaon it tinoea ag prutas kundi puro mga kapsula eamang. Busa, ratong owa naga adto sa eskwelahan ag naga-warang sa kalye ro peligroso nga makita it mga Alien. Halin kato, sa bulig it eskwelahan, guin tatap ro mga eskwela. Kon Dominggo, idto sanda naga simba sa andang simbahan ay ro Alien nahadluk sa Diyos. Ag ro gobiyerno hay naga pani-id sa tanan nga mga onga sa kalye ay guina dakop ag daehon sa peresuhan. /MP