Tub-ok Akean Kite Festival 2008

Maga–Eupad Sa Hunyo 22

Maga-kolor ro kaeangitan sa may lugar it Aklan State University, Kalibo Campus ground, Barangay Andagaw sa paea-abuton nga Hunyo 22 sa pag-eupad it Tub-ok Akean Kite Festival 2008 nga maga-umpisa it alas syete it agahon hasta alas dose it odto ro adlaw.

May daywang kategorya ro Tub-ok Akean Kite Flying Festival 2008. Rondaya hay ro flat kite category nga may mga premyong P3,000 sa first place, P2,000 sa second place ag P1,000 sa third place. Sa figure o geometric type category hay P5,000 sa first place, P4,000 sa second place, ag P3,000 sa third place.

May special award nga P2,000 mat-a para sa tag-ana it bolador nga may temang naga kaa-ngot sa selebrasyon it kapyestahan ni Señor San Juan.

Ro tub-ok Akean Kite Flying Festival 2008 hay sa idaeum it pagpadaeagan it Kalibo Ati-atihan Management Board. Ro papremyo hay gin-sponsoran it gobyerno probinsyal it Akean.

Sponge Cola, Magasigabong

Sa Food Festival Sa Kalye

Magasigabong ag magapasadya sa Food Festival Sa Kalye year thirteen ro sikat nga rock band nga naka-base sa Metro Manila, ro Sponge Cola, sa Hunyo 23, 2008.

Kilaea sa mga popyular nga kantang “Pasubali,” “Bitiw”, “Gunita” ag “All We Need”. Ro grupong Sponge Cola hay magatao it kasadyahan sa mga bisita ag tag naga paeamasyar sa mga naga kasari-saring mga restaurants ag hoteliers sa idaeum it Kalibo Ati-Atihan Tourism Council nga naga partisipar sa ika-13 nga paghiwat it food festival.

Nangin tradisyunal ag gina hueat-hueat eon nga hilikuton ro pagpatigayon it food festival sa kalye daea man ra sa pag abi-abi naton it mga turista mapa local o taga ibang nasyon. Raya hay naangot man sa selebrasyon it kapyestahan ni Señor San Juan nga gina sustenar it local nga gobyerno it Kalibo sa aktibong pakikipag kooperar it grupong Kalibo Ati-Atihan Tourism Council (KATC).

Ro food festival sa kalye hay isaeang ka paagi agud ro mga tag-ana it mga restaurant ag hotel nga myembro it KATC hay mai-showcase ag maipa-ambit ro mga local nga mga pagkaon ag serbisyo sa mga bisita ag mga pumueoyo. /MP