Sugilanon Ni Tita Linda

Tita Linda Belayro

Ro Bosoe Ni Sarik

May sangka nanay nga may unga nga si Sarik. Guin sugo si Sarik ko anang ina nga ibaligya eonlang ro andang baka sa tindahan ay indi eon mapuslan bangud magueang eon. Pumanaw si Sarik guyod ro baka. May nasubeang imaw nga magueang ag guin byluhan kana it bosoe nga makata-o kana it manggad. Guinbaton ni Sarik ro bosoe sa engganyo it magueang. Pag-abot sa anda, guin tao nana ro kabak-eanan nga bosoe kay Nanay na. Sa kaakig ko anang ina, hinaboy nana ro bosoe sa liwan it bintana.
Pagkaaga, nangawa si Sarik nga may nagtubo nga tanum sa andang kilid it baeay. Sinaka nana. Hapan-uhan man nga idto gali nagatumoy sa ibang kalibutan. Idto nagaestar ro mga maintok nga tawo ag naga tinibag it mga bato agod ayagon ro bueawan ag obrahon nga bareta. Guina bantayan sanda it higante nga imaw naga panag-iya ko bueawan. Kon mahinay ro pagtrabaho ko mga tawo hay guina hueog nana sa nagabukae nga kawa.
Nagbo-oe si Sarik it sangka baretang bueawan parabil nanaog. Guinbaligya nanda ro bueawan busa nag manggaranon sanda. Ka’t naubos eon ro andang kwarta, bumalik eon man si Sarik idto. Tama guid nga bag-ong bugtaw ro higante.
"Matsa may nahum-gan akong ibang tawo iya", singgit it higante. Guin-usoy imaw ko higante. Nagpakita si Sarik. Guin-eagas imaw it higante.
Kat guina dakma eon kunta si Sarik it higante hay maabtik nga eomokso si Sarik sa pihak nga parte ko kawa. Sa pagsunod it higante, owa imaw naka panimbang ag nahueog imaw sa naga bukae nga kawa. Ogaling, naka-takas pa guihapon ro higante Sige ro anang eotos kay Sarik. Nag daeagan si Sarik sa baeagon nga tanum. Guin sunod imaw ko higante. Ka’t sa katung-anan eon ro higante, guin potoe ni Sarik ro puno ko anang daeang porakoe. Nahueog ro higante sa eogta nga tumama ro anang oeo sa mabahoe nga bato ngani namatay. Nag hugyaw ro mga maintok nga tawo sa pagkamatay ko higante. Mas malipayon si Sarik tongod abo nga bareta ro anang nasaeod sa boesa parabil imaw bumalik pauli. /MP