Tita Linda Belayro
Guinsumpa Nga Prinsipe
Nag asawa it uman ro hari it Bersalya maskin bag-o eamang mamatay ro asawang reyna. Masubo ro prinsipe sa kasae ko anang ama. Owa naila ro prinsipe sa bag-ong reyna. Agod mabueong ro anang kamingaw, nagpamasyar imaw sa kagueangan, kaibahan ko anang alalay nga si Sandro. May hakita sanda nga isaeang ka usang puti. Andang guin eagas hasta hadakpan nanda ag hapatay. Owa sanda nakasayod nga guina panag iyahan gali ro usa ko anang madrasta. Naakig it duro ro reyna ag guin sumpa nana ro prinsipe nga mangin kabayo. Hakita ni Sandro ro tanan. Kada adlaw nangin kabayo ro prinsipe ag kon gabii eamang nagiging tawo. Umpisa kato, owa guid sanda nakasayod kon sin-o ro nag sumpa.
Isaeang adlaw, samtang naga sakay si Sandro sa kabayo, may hasubeang sanda nga magueang. Guin pakaon ni Sandro ro magueang. Hakita ko magueang ro naga kabit nga kulentas sa li-og it kabayo. Anang guin buksan ro locket ag hakilaea nana nga prinsipe ratong kabayo. Guin sugo nana si Sandro nga boe-on ro bote sa kwarto it reyna nga may sueod nga berdeng likido ag ibuhos sa eawas ko kabayo. Nag uli ro daywa ag guin higot sa kwadra ro kabayo.
Batasan it reyna ro naga pasilak kon agahon sa hardin. Pagkakita ni Sandro nga idto sa hardin ro reyna, nagsueod imaw it sekreto sa kwarto it reyna ag guin bo-oe ro bote. Dali-dali nana nga guin bubo-an ro kabayo ag nagbalik sa dating dagway ro prinsipe. Ro habilin sa bote hay guin butang sa tubi nga guina imnan it reyna.
Tumaliwan ro mga inadlaw, haabutan ro reyna nga maniwang ag masakiton sa anang sekreto nga kwarto. Ro kamandag ko sueod it bote hay nag-eatum eon sa anang eawas ag owa mabuhayi imaw hay namatay. /MP
No comments:
Post a Comment