Sugilanon Ni Tita Linda

Ni Tita Linda Belayro

Guinhampangan it Duwende

Ro baeay nanday Emie hay may bungsod sa idaeum, sa oto. Kada agahon kon imaw magpanilhig hay hakikita nana nga may mga bueak ag prutas sa bungsod ngaron. Ko olihi, bukon eamang it prutas ro anang hakikita kundi mga kutsara ag tinidor pa nga pilak. Guina kaon ni Emie ro mga prutas. Guina tago nana ro mga kubyertos.

Isaeang bes, hadakpan ko anang ina ro mga gamit. Tongod karon, guin pangutana si Emie kon siin nana guin bo-oe. Ro anang sabat hay sa anang amigo. Indi magpati ro anang ina. Guin bunaean ko anang ina si Emie tongod sa pag eaum nga anang guina panakaw rato.

Sa uwa magbuhay, ko olihi, nagmasakit si Emie.

Samtang guina bantayan imaw ko anang ina, may nagpakita nga isaeang ka duwende nga may daeang dahon. Guin pakumos ratong dahon ag ipuga sa tubi agod ipa inum. Nagmayad si Emie ag nagkilaea ro anang ina ag ro duwende.

Pagkataliwan it pilang adlaw, nag abot ro anang ama nga mataas ro eagnat ag naga kurog, agahon pa. Nangayo it bulig si Emie sa duwende. Guin taw-an man nana it dahon si Emie. Guin pa-eaga ag guin painum. Nagmayad man ro anang ama.

Tongod sa kabuot ag mainamiguhon si Emie, guin taw-an imaw it kubyertos nga bueawan ko duwende. Andang guin baligya ro iba agod ipatindog it baeay ag tindahan. Guin pabay-an ro bungsod it duwende. Owa guid nanda pag guba-a ro bungsod kundi guin pakuraean pa ngani it semento agod indi masamad. Nag mang-garanon sanday Emie. Tanan ro naga pangayo guina taw-an. Owa guid paghikawi. /MP