Sunday, June 27, 2010

Sugilanon Ni Tita Linda


Ni Tita Linda Belayro
Kontra Amulet
Si Marites hay solong onga ni Aling Salud. Masaligan imaw sa tanan nga bagay, relihiyosa ag may hitsura. Abo nga naga pangasawa kana. Isaea eon si David nga may pag tan-aw kay Marites. Isaeang ka negosyante si David. Kada hapon naga bisita si David kay Marites ag perming may haead nga regalo. May kahilapit baeay si Marites nga si Elsa, sangka daeaga mang nahikaw guid imaw kay Marites. Sekreto si Elsa nga naila kay David, busa, bu-ot nanang agawon ro binata kay Marites.

Isaeang hapon, nagpamasyar si David sa daeaga ogaling nagpanaw sa banwa si Marites, owa sanda magkita. Hasubeang ni David si Elsa. Guin sampit imaw ni Elsa agod idto sa andang baeay hueaton si Marites. Guin taw-an na it pamahaw si David. May guin preparar gali nga eomay si Elsa kay David. Guin taw-an it pamahaw ag tubi. Busa pag inom ni David it tubi, nag epekto ro eomay.

Ro anang panoeok kay Elsa hay si Marites. Dungan man nga nag abot sa andang baeay si Marites. Pagling-ling na sa bintana, hakita nana nga naga haeaksan ro daywa. Pagkakita ni David kay Marites, nag away ro mag nobyo. Ko olihi, naduea eon ro epekto ko eomay ag owa eot-a si David naila kay Elsa. Nagpanaw it hipos si David sa ibang lugar nga owa it nakasayod. Tongod sa paltos ro plano ni Elsa, binalikan nana si Marites.

May anang lola nga mayad mag amulet paagi sa abo. Guin eobong nana ro retrato ni Marites sa abo. Tongod kato, nag katoe ro eawas ni Marites. Nag adto imaw sa isaeang ka manog bueong. Suno sa mediko, guin amulitan gali imaw. Ro guin obra man ko mediko, nagbo-oe imaw it nigo ag guin butangan it abo. Dayon nga anang guin huyop ro abo.

Bumalik ro abo sa oyahon ni Elsa ag hapuling imaw. Busa nabulag imaw. Dugang pa haputos man it goeos ro anang eawas. Ka’t owa eon katakod imaw, nangayo imaw it patawad. Naeo-oy si Marites ag guin pa ulian imaw. Nangin maeo-eot nga mag amiga sanda ko olihi. Kon ano ro natabo kay David, owa it nakasayod. /MP

No comments: