Sugilanon Ni Tita Linda

Ni Tita Linda Belayro

Sa Kaharian It Mga Prutas

May isaeang ka unga nga malisod pakan-on it prutas o bungang kahoy ag tinoea, si Sonny. Tongod sa Saudi ro anang ama, pagusto eang imaw it pagkaon sa andang canteen. Kon mag abot ro andang "allotment", naga paayaw-ayaw gid imaw it kaon it "ice cream, hamburger, French fries" ag iba pang mantika-on nga pagkaon. Sa pihak karon, pirmi eang imaw guina sip-on ag guina hapo, busa permi sandang ga adto sa doktor. Guin bilinan it doktor si Sonny nga magkaon permi it prutas ag berdeng tinoea. Tongod bukon it anad, permi sanda nga naga away ko anang ina.

Ko gabi-i ngaron, nagdamgo si Sonny. Nag hinampang kuno imaw sa eati ag nahueog imaw sa mabahoe nga buho. Dumeretso imaw sa idaeum sa kaharian it mga prutas ag tinoea. Guin pasueod imaw ko guwardiya nga si Lemon ag Simuyaw.
"Kami ro bantay it kaharian, kami man ro prutas nga bantay sa eawas it tawo para indi makasueod ro mga masakit ag iba pang kaaway ko atong kaeawasan. Daehon ka namon sa among reyna nga si Reyna Mega", hambae ko daywang ka prutas kay Sonny. Sumunod imaw ag idto imaw guindaea sa trono ni Reyna Mega.

"Malipayon nga pag-abot, Sonny", abi-abi ni Reyna Mega. Guin patawag ko reyna ro tanan nana nga mga unga. "Rondaya sanday Kaeabasa ag Tisa. Sanda ro akong mga bueawan nga mga unga. Manggaranon sanda sa Bitamina A ag sanda ro pangontra sa pagkabulag", pagpakilaea ni Reyna Mega.

"Rondaya si Saging. Abo kamo nga tanum kara. Manggaranon ra imaw sa Potassium ag pangontra imaw sa Insomnia o indi makatoeog.

Si mangga ag kapaya ro akong mga unga sa pag pa-gwapa. Maka tampi man sanda sa tawong indi matunawan. Naga papino sanda it panit ag manggaranon man sa Bitamina C". Hakita ni Reyna Mega si Ampalaya nga naga kulisong sa binit.

"Sori gid ampalaya, madueom abi ro imong uyahon. Raya man ro akong unga nga maskin bukon it pino ro anang panit hay manggaranon sa Iron ag pangontra sa Anemia. Sayod ko nga owa ka naga kaon it prutas, Sonny. Bu-ot mo magkaon ko mga junkfoods?

Owa ka it sustansiya nga mabu-oe kundi puro coloring, preservatives, ag mantika. Sa olihi, maga tambok ikaw, ga masakit it diabetes ag high blood. Kon magmasakit ka, kueang pa ipabueong ro sweldo ni tatay ag nanay mo."

Hinadlukan si Sonny, habugtaw imaw. Hakita nana ro mga prutas sa lamesa. Kina-on nana tanan. Pag guwa ko anang ina, hangawa imaw ko anang hakita. Milagro!! /MP