Sugilanon Ni Tita Linda

Ni Tita Linda Belayro

Kakapid Nga Kataw

Nagabaton it eabahan si Luisa sa mga may kaya nga mga pamilya. Idto imaw naga eaba sa suba agod owa it bayad sa tubi. Naka asawa imaw it mahugod, si Kardo. Ag si Kardo ro naga hatod kana sa suba parabil mag adto sa anang eanas. Samtang naga eaba si Luisa hay naga kinanta man imaw. Owa imaw nakasayod nga may mga sirena nga naga pinamati gali sa anang kanta.

Isaeang adlaw, owa it kanta nga habatian ro mga kataw, busa masubo sanda sa mga kabatuhan. Nag unga gali si Luisa busa, owa ka labada. Pagguwa ko onga, puro himbis ro anang eawas. Guin pangaean kay Sarina. Nasayuran ko mga tawo ro pagkatawo ni Sarina busa abo nga mga unga nga nahadlok kana. Para magtahaw ro kutso-kutso it mga tawo, nag paeagiw ro magpamilya. Owa it iba nga guina hampangan si Sarina kundi sa suba. Ko olihi, nagpaeapit kana ro mga kataw ag nangin kahampang nanda.

Ko olihi, guin daea si Sarina sa kaharian it mga sirena. Malipayon imaw sa kaharian it mga sirena ag kon mag uli imaw, guina pabaeonan pa imaw it mga perlas.

Nag abot ro kapistahan sa andang baryo. Bu-ot ko mga sirena nga mag intra imaw agud maging reyna it kapistahan. Guin taw-an imaw it mga perlas agod ibaligya ag ihueog sa urna. Pagkatapos it paghuyap, nagdaog si Sarina nga mabahoe ro abante.
Pag abot it bisperas it kapistahan, guin tuya-tuya imaw tongod reyna kuno imaw it mga himbis. Napahuya it abu si Sarina. Nag uli imaw nga naga tangis. Pagkasayod ko mga kataw, guin daea imaw sa andang reyna. Idto guin taw-an imaw it banyos nga gulaman. Ibanyos nana pag abot sa gabi-i it koronasyon.

Ko gabi-i ngaron, hakibot ro tanan nga mga tawo pagkakita kay Sarina. Ka gwapa-gwapa imaw sa anang mala prinsesa nga biste ag pareho it porselana nga mga gamit. Abo nga kaeaeakihan ro nabighani kay Sarina. Isaeang ka mabuot ag uniko iho nga si Roberto ro anang naging asawa. Nalipay man ro mga sirena tongod nangin malipayon man ro andang amigang si Sarina. /MP