Sunday, May 22, 2011

Sugilanon Ni Tita Linda


Ni Tita Linda Belayro


Eahong Sa Puno It Akasya


May isaeang ka mabahoe nga puno it akasya nga naga tubo sa isaeang ka lugar. Magueang eon rondayang puno. Suno sa mga katigueangan sa ratong barangay, una eon sanda naga hampang sa puno nga may mabahoe nga eahong. Rondaya ro guina panilungan ko mga bakero kon magbantay sa andang mga hayop. Isaea eon si Amber nga guina bayaran ro anang serbisyo sa pagbantay ko mga hayop it ibang tawo.


Isaeang adlaw, nagkinilat, madamoe ro gae-um. Nag umang ro mga hayop, nag-dinaeagan. Guin inusoy ni Amber ro anang mga hayop pagkatapos it kidlat. Hakita nana ro iba, ogaling abo guid nga kueang. Tongod masyado ro oean, nanilong anay imaw sa eahong it akasya hasta hakatoeogan imaw. Sa anang pagmuk-eat pagkataliwan it daywang oras, idto imaw sa isaeang ka palasyo.


May kaharian gali sa idaeum it akasya. Mga mabuot ro mga tawo idto. Guin serbihan imaw ko pinaka reyna ogaling owa guid imaw magbaton. Hadumduman abi nana ro suguilanon ko anang lola nga indi gid magkaon sa lugar it mga engkanto. Sa uwa magbuhay, hadumduman nana ro anang mga hayop busa nag-eaong imaw nga mag uli. Sa anang pagmuk-eat it uman, idto eon imaw sa liwan it eahong ag kompleto eon man tanan ro anang mga hayop.


Tongod karon, bo-ot gid nga magbinalik–balik si Amber sa lugar it mga engkanto. Nangin kahampang nana ro dalagita nga prinsesa. Kada uli nana, guina pabaeonan imaw it mga eoy-a nga pag-abot sa liwan hay nangin bueawan. Guin regaluhan pa imaw it isaeang ka baston. Rondaya ro guina haboy nana sa mga lobo nga naga kaon sa anang mga hayop. Rondayang baston hay naga kaeayo man, busa owa it mapintas nga hayop ro makasu-od sa anang mga hayop.


Nangin hamtong eon nga binata si Amber. Bu-ot nana nga ibalik eon sa tag ana ro andang mga hayop. Nag ea-ong imaw nga magpanaw sa maeayo nga lugar. Ogaling, sa kamatuoran, idto man-lang imaw nag adto sa lugar it mga engkanto. Owa it naka sayod kon siin mag adto si Amber.


Ko olihi, imaw ro nangin asawa ko prinsesa ag malipayon imaw sa rondayang kaharian. Kon mahayag ro buean, naga guwa imaw it mahipus agod masayran ro pag pangabuhi it mga tawo. Hakikibot eamang ro mga tawo kon makakita it mga pagkaon nga prutas ag pilang sipi nga eoy-a sa andang ogsaran.


Hasta makaron, buhi pa si Amber sa ibang katawohan. Una imaw sa mga mabinuligon sa pobre, sa mga malimpyo it panghuna-huna ag tagipusuon nga naga batyag sa kapigaduhan it iba. Abo nga Amber una sa aton nga palibot. Ikaw isaea ka man baea? /MP

No comments: