Makapobre Ka? O Matapobre?

* A letter to the MP published without alteration. It is unsigned but the letter sender’s name outside the envelope is Mr. Felizardo Sanchez.

Dear Dr. Botoy,

Wa eon ako kinahang-ean it ngaean o pirma. Ako isaea sa libo-libo nga mangunguma, tricycle driver, security guard, food vendor, manugkae-kae it basura, labandera, manogbaligya it tinuean-on o mga ma-inintok nga empleyado, pribado man o gobierno, nga gasalig sa PhilHealth para mabuhin-buhinan ro gastos sa kamahae-mahae makaron nga bueong ag doktor.

Kun owa it PhilHealth, gakamaeatay eonlang rang asawa, rang mga onga, rang mga apo, rang mga igmanghud nga indi kasamit it hospital. Wa man ako it eugta, anwang, o kun ano nga propiedad para ibaligya ag makabayad sa hospital ag sa doktor. Abu kaming makahambae nga ibaligya eonlang ro among kaeag para masalbar sa kasakit o sa kamatayan ro among mga palangga.

Pero hara,  nagdoble ro bayad sa PhilHealth. Mga 30 mil kaming gasalig sa PhilHealth nga nabayaran ku gobierno probinsyal sa kaeu-oy ni Gov. Marquez ag naamutan man sa kaeu-oy ni Congressman Joeben Miraflores ag Nonong Haresco ku Kasangga Party List. Saeamat gid sa andang kaeu-oy. Pero kumo nag doble ro sukot ku PhilHealth indi eon masarangan ku kwarta nga gin-aeamutan ku tatlo. Buhinan ro PhilHealth beneficiaries. Imbes 30 mil, 15 mil eonlang ro mataw-an it PhilHealth. Paalin ro 15 mil ngara? Gatampoe eonlang it lampunaya? Ga agto sa faith healer nga kun amat mahae pa sa doctor? Gapanguros eonlang, magpina ea-ea ag maghueat it kamatayan?

Ro ideya kunta ni Gov. Marquez hay mabo-oe it hueay (20 porsiento malang) sa kwarta nga nabayad ku PhilHealth sa atong mga maea-haeon nga mga doktor para ibayad sa PhilHealth ku 30 mil ngarang mga pobre. Ro aton ngarang mga doktor, owa’t eabot sa sweldo ku gobierno probinsyal, owa’t eabot sa maeagko nga kwarta nga nabobo-oe nanda sa mga may una-una nga mga pasyente hay – Diyos ko! May hueay pa sa PhilHealth ku mga pobre.

Sa ordinansa nga ginpasa sa Sangguniang Panlalawigan, may mga SP member nga nag-abang. Isaea eon si Vice Gov. Billie Calizo. Nag alma ro mga doctor nga sanay eon sa abu nga kwarta.

Nakiha kuno ku mga doktor si Gov. Marquez. Gov. Marquez: kun saea ring gina ubra padayuna ring saea nga gina ubra. Bukon ron it saea sa Diyos ag sa tawo. Sa mga doctor, buhin-buhini man ninyo ro inyong  pag  higugma sa kwarta. Maeu-oy man kamo kamon.

Kay Vice Gov. Billie: makapobre ka o matapobre?  /MP