Sugilanon Ni Tita Linda

Ni Tita Linda Belayro

Bueak It Katsubong

Mabuhay eon nga naga inubo ro tatay ni Pilar. Sige ro andang pag paboeong sa doctor. Abo eon ro andang hagastos sa hospital ogaling sige pa guihapon ro anang pag minasakit. Permi eang naga palitik ko andang oeo say Pilar kon ano eon lang ro paagi agod magmayad ro andang ama.

Ko isaeang agahon ngaron, samtang naga buead si Pilar ko anang linabahan, hapan-uhan nana ro isaeang ka bueak it Katsubong nga bag-ong buskad sa andang hardin sa andang tampaan. Mingko naga hambae kana nga himu-on ra nga sigarilyo ag ipasigarilyo sa anang tatay nga may masakit. Guin sunod nana ro limog nga naga halin sa bueak. Guin pamaea ro bueak parabil guin obrang sigarilyo. 

Pagmaea, guin himo nanang sigarilyo ro bueak it Katsubong, guin sindihan ag guin pasigarilyo sa anang ama. Ko isaeang gabi-e ngaron, hamu-ok ro tueog ni Mang Sitoy. Amat-amat nga nagbalik ro sadyaan nga kaeawasan. nagpundo ro pag ubo. Nalipay man si Pilar sa natabo sa anang ama.

Isaeang adlaw, samtang naga adto imaw sa obra, may habasa imaw nga pahisayod nga nakasueat sa “tarpaulin”. Ro pahisayod hay naga kangay nga mag adto sa sangka paga hiwaton nga seminar sa mga “herbals” sa sin-o man nga naila.

Ay Pilar nga guin tandaan ro pahisayod. Pagkatapos it anang obra, nag agi dayon imaw sa seminar ag nagpamati. May mga nasayuran imaw hanungod sa Katsubong nga maka tapna sa ubo o sa may masakit nga Asthma (Hapo). 

Bueong gali ro bueak it Katsubong sa pagpapundo it ubo, naka pahagan-hagan it pamatyag ag nakapatoeog pa. Ogaling kinahangean nga indi magsalig eang permi sa bueong ro tawong naga masakit. Kinahangean guid ro presko nga hangin, ehersisyo ag masustansyang pagkaon pareho it isda, tinuea ag prutas. 

Halin kato, guin tatap it mayad ni Pilar ro anang tanum nga Katsubong sa andang hardin. Agod maka bulig man imaw sa ibang tawo nga naga kinahangean, anang guina buead ro mga bueak agod bisan anong oras, may anang ikatao sa anang ama kon abuton it masakit nga hapo. /MP