Sugilanon Ni Tita Linda

Ni Tita Linda Belayro

Regalo Kay Amor

Ilo eon si Amor sa ina. Tongod bata pa man ra anang ama, nag asawa it uman sa isaea man ka baeo. Ro pangaywang ngarang asawa hay may daywang ka unga nga babaye. Samtang sa obra ro anang ama, guina tatap ko mag ina si Amor. Sa andang pag sinaeayo, owa guid naga reklamo si Amor maskin maeain eon ro pamatyag sa anang eawas.

Isaeang adlaw, guin sugo ko daywang ka magmanghod si Amor nga mag usoy it bueak nga tulips agod ibutang sa andang buhok parabil mag adto sa baylehan. Nagpanaw ro pobre nga daeaga. Ubos eon nana it libot ro lugar ogaling owa guid imaw it hakitang tulips nga bueak. Nag uli lang si Amor. Pag abot nana sa andang baeay, tongod owa it bueak, guin sabunutan imaw ag owa pagtaw-i it pagkaon. Nagkatoeog nga gutom si Amor. Ko gabi-i ngaron, nagpakita kay Amor ro isaeang ka Ada. Guin dawat ro anang alima ag nag eopad sandang daywa paadto sa kaharian it mga engkantada. Kalipay tanan-tanan ro anang hakita sa mga engkanto. 

Matsa habugnutan it tunok ro anang dughan sa sobrang kalipay. Parabil magpanaw imaw, guin papili imaw ko anang nailaan nga mga bato una sa ibabaw it lamesa. Isaeang ka puting bato ro anang guin pili nga may taga bulag. Pagbugtaw nana, una sa anang alima ro bato. Halin kato, maskin nano ro sugo kana ko anang pangaywang ina hay nahimo ni Amor nga owa naga reklamo. Paagi sa bato naka-adto imaw sa iba-ibang lugar, ag nakakaon it sari-saring pagkaon. 

Hangawa ro daywang ka babaye, busa guin bantayan nanda si Amor. Bu-ot nandang masayran ro tinago ni Amor. Pagtaliwan it pilang adlaw, hadiskubre nanda nga isaeang puting bato gali ro naga ta-o it gahum sa daeaga. Nag usoy ro daywang ka magmanghod it pahito kon ano ro andang himu-on sa daeaga. Andang guintakaw ro bato ag guin samitan kun epektibo man kanda. Nanakaw sanda sa isaeang ka department store it mga iba-ibang pagkaon, ogaling hadakpan sanda. 

Bukon it epektibo ro bato sa mga tawong may maeain it tagipusuon ag handum. Guin balik ko daywang ka magmanghod ro puting bato kay Amor ag nangayo sanda it pasensya. Guin patawad man sanda ni Amor. Halin kato, mabuot eon sanda kay Amor. Nangin malipayon sandang magpamilya.  /MP