Thursday, July 19, 2012

Sugilanon Ni Tita Linda

Ni Tita Linda Belayro


Igmanghod Nga Sawa

May sangka mag asawa. Si Badong ag si Selya. Naga mabdos si Selya sa anang panganay nga onga. Pilang buean pa eang sa anang tiyan. Isaeang adlaw, samtang naga panilhig imaw sa andang guwa it baeay, may hakita imaw nga naga eokon nga sawa sa kahon. Hamuok nga naga katoeog. Mahimong bag-o eang naka subad it manok ro sawa sa andang kahilapit it baeay. Mabahoe abi ro anang tiyan. 

Sa kakibot ni Selya, nagdali-dali imaw it daeagan. Nagbo-oe imaw it kahoy agod ieampos sa sawa. Ogaling naka bugtaw ro sawa, umatubang kay Selya nga mingko naga pakit lu-oy kana. Uwa pagpadayona ni Selya ro pagsakit sa sawa. Anang guin pabay-an nga pumanaw ro sawa paeayo. Halin kato, owa eon it naga kaon nga sawa sa andang mga alilang sapat pareho it manok sa andang lugar. 

Umabot ro oras, nag unga eon it isaeang ka eapsag nga babaye si Selya. Guin pangaeanan ro unga nga si Marisa. Pagtaliwan it pilang dag-on, ko agahon ngaron, samtang naga hampang si Marisa, may isaeang ka maisot nga sawang puti ro nagpakita kana. Mingko naga kasugot ro daywa. Pag abot ko asawa ni Selya nga si Badong, hakita nana ro sawa kaibahan si Marisa. Golping guin gabot ni Badong ro anang sanduko agod tigpason ro sawa ogaling guin punggan imaw ni Selya. Owa madayon ro pagpatay sa sawa.

Halin kato, nangin bisita nanda permi ro sawa. Una pa ngani naga eobog maeapit kay Marisa. Kon amat, guina bilin nanda sa sawa si Marisa agod bantayan kon gapanaw sandang mag asawa. 

Samtang naga taas ag naga bahoe si Marisa, naga bahoe man ro sawa. Mabahoe eon si Marisa pagtaliwan it an-om nga dag-on. Nagbukas ro klase ag naga adto eon sa eskwelahan si Marisa. Naga ibilin sa baeay ro sawa samtang naga trabaho sa eanas si Badong ag Selya. Si Marisa mat-a hay sa eskwelahan.

Isaeang adlaw, nag uli si Marisa halin sa eskwelahan nga nagatangis tongod guin eogos tanan ro anang baeon nga pagkaon ko mga pilyo nga mga unga nga anang sangka klase.

Bu-ot nga buligan it sawa si Marisa. Nagdaeagan ro mga pilyo hasta umabot sanda sa palhing lugar. Idto nanda guin buksan ro baeon ni Marisa. Pagbukad ko mga pilyo nga unga sa bag ni Marisa, may hakita sandang sawa nga naga eokon sa sueod it bag ni Marisa. Nagdaea-eagan ro mga unga sa kahadlok. 

Halin kato, owa eon it naga paloko kay Marisa. Hasta nga nagdaeaga si Marisa, una pa guihapon ro sawa kana hasta guid imaw hay nakakita it mabuot nga asawa. 

Tapos eon ro kasae, tapos man ro punsiyon. Nagpanaw ro sawa nga owa hapan-uhi ni Marisa. Sayod ro sawa nga may maka tatap eon kay Marisa ag indi eon imaw kinahangean pa.  /MP

No comments: