Friday, January 05, 2007

Sugilanon Ni Tita Linda

Tita Linda Belayro

Ana Conda

Ana Conda – ro ngaean ko isaeang ka mabahoe nga sawa nga makita sa kagueangan it Africa sa guinatawag nga Amazon jungle.
Suno sa mga katigueangan una sa rayang lugar, may isaeang ka itom nga orchids ro naga tubo sa isaeang ka kahoy. Sin-o man ro maka inom ko anang duga it nasambit nga orchids, imaw hay mangin bata sa anang hitsura. Ogaling raya hay guina bantayan it isaeang ka mabahoe nga sawang si Ana Coda.
Naka abot rayang balita sa Bag-ong Kalibutan (New World). Bu-ot nanda nga tukibon rayang orchids. Gusto man nanda nga pamatud-an kon baea matuod rayang balita ag eabi gid, agud man makwartahan.
Naglayag rong sangka grupo nga pulos adventurero sakay sa isaeang ka mabahoe nga barko. May daea sanda nga mga pagkaon nga de lata, mga alahas, igdaeapat sa baeay, maeahaeon nga tela ag mga boeong. Pagdungka nanda sa pinakapuerto it rayang isla, nag-osoy sanda it mga giya nga taga-una pa adto sa orchids. May isaeang ka magueang nga may mahabang puting buhok nga guin hun-an sanda nga indi magpadayon tongod peligroso ro andang guina planong paga adtonan. Owa guid nanda guin pamati-i rong magueang. Padayon ro andang pagtukad sa mga kabukiran ag pagtabok sa mga kasuba-an. Owa mabuhayi, hakita nanda ro isaeang ka kahoy nga suluhanon nga naga tubo. Idto sa pinakapunta nagakabit rong itom nga orchids. Isaea sa mga giya rong nagahama-hama, indi mapunggan rong anang dogalingon. Dali-dali imaw nga sumaka sa kahoy agod boe-on rong bueak, Parabil imaw maka saka, tumunga rong sawang Ana Conda. Naka hugom si Ana Conda it preskong dugo it tawo. Tongod gutom ro sawa ko mga oras ngaron, golpeng sinakmae ko sawa rayang giya ag tinoeon it bilog. Sa andang hakita, hinadlukan ro mga giya pati man ratong mga adventurero. Bu-ot magbalik eonlang ro mga giya. Para indi anay sanda magbalik, guindugangan pa guid ro guinta-o nga alahas, igdaeapat ag mga pagkaon para sa andang mga pamilya.
Isaeang ka giya ro nag prisintar nga mangin paon. Guin bô-bô-an imaw it pang patoeog ag guin haead sa sawa. Pagka hugom it sawa, guin toeon man imaw it bilog. Owa mabuhayi, dinuyog rong sawa ag hakatoeogan. Dali-dali nanda nga guin saka rong Orchids. Dayon pagka potoe ko orchids sa pag kupô sa sanga, guin eâ-gâ ro pilang parte ko bueak agud mainom rong pinabukaean nga parte. Ro iba nga kaibahan hay owa mat-â mag inom tongod gusto nanda nga daehon sa datag agud ipakita sa bilog nga kalibutan rong maeahaeon nanda nga natukiban ag guin angkon. Nag uli ta sanda. Ratong nag pabilin nga nag-inom ko pina-bukaean nga orchids hay nangin sawa ag nag pabilin una sa kagueangan. Owa nakasayod ratong nagbalik kon ano rong natabo sa andang guin aywan nga mga kaibahan. Daea nanda ratong itom nga Orchids nga puno it pagkahakug sa andang paino-ino.
Mientras owa it pagkilaea rong tawo sa plano it Dios, mientras rong kahakog hay naga pabilin sa paino-ino it tawo, bukon eamang it itom nga Orchids rong paga handumon. Sa kada maitum nga plano, sa kada paglalis kong kasuguan it Dios, may una man nga Ana Conda nga naga hueat kanda. Sa mga gustong magpabata, hayra ro hambae it isaeang ka mangin aeamon: "Kasing bata ka ko imong pagtu-o, kasing gueang ka ko imong pagduda; kasing bata ka ko imong kompiyansa; kasing gueang ka ko imong kahadluk; kasing bata ka ko imong pag-ea-om; kasing gueang ka ko imong kapaslawan. /MP mailto:madyaas_pen@yahoo.com

No comments: