Friday, January 26, 2007

Sugilanon Ni Tita Linda

Tita Linda Belayro

Magic Glab


Agahon pa si Sanny hay naga tueod eon ko anang kariton sa kahabaan kong Roxas Boulevard sa Manila. Sa isaeang ka eskinita may naka tambak nga mga basura nga nagahueat kana. May hakita imaw nga eaging glab nga naka putos it plastik. Anang guin bukad ag hakita nana nga may nakasueat "Para sa maisog" ro marka. Guin daea nana rong glab sa andang baeay ag guin samitan it suksok. Matsa may kabuhi rayang glab. Guina pilit imaw nga ibayo sa hangin. Indi nana mapunggan rong pagbinayo it glab hasta gina-oy imaw, nalipong ag hakatueogan. Nagdamgo imaw. Guin damgo nana kon sin-o rong tag-ana ko rayang glab. Guin dayaw rong pagiging maabtik ag maila ni Romano. Parang palos imaw sa ibabaw it ring ag naayawan kana it sunod ro anang kahampang.
Abo nga mga sugaroe rong nag manggaranon kay Sanny Romano ag abo man rong nagka pobre. Sa kada pagdaug ni Romano, nag – iba rong estado ko anang pangabuhi. Abo nga mga babaye rong nahumaling kana bukon eamang it mga daeaga kundi rong may mga asawa pa.
Abo man nga igdaeapat ro andang napundar. Ro anang asawa ag mga onga hay nagpasasa sa manggad nga umaeagi eamang. Hasta umabot ro owa nanda guina huna-huna-a.
Sa katapusan nga engkwentro ni Romano naigo ro anang oeo ag inapok imaw sa kilid it ring. Owa eon nana mabati-i rong huyap it referee. Natapos sa ika limang round eamang rong boxing. Nag hugyaw rong nagdaug, maskin si Romano hay sa ospital dinaea. Pagbugtaw nana, owa eon nana makilaea ro anang kaugalingon pati ro anang pamilya. Sige ro pag binoeong kana hasta naubos ro anang guin pundar nga mga igdaeapat.
Ro katapusan nga igdaeapat nga anda nga guin baligya hay ro andang baeay. Sa paghubo ko bag-ong tag ana kong baeay, guin panglimpyohan nanda ag guin pang pilak ro mga basura eakip eon rong glab nga nakakabit sa grahe. Owa nakasayod rong bag-ong tagbaeay kon nano rong historya nga nakaputos sa rayang glab. Busa andang guin pilak sa basurahan. Golpeng nagbugtaw si Sanny kat pukawon imaw ni Nanay na agod mag ilabas.
Lumipas ro mga dinag-on, hamtong eon nga soltero si Sanny. Nadumduman nana ratong glab nga guin limpyuhan na ag guin tago. Guin usoy ag hakita sa basurahan. Sa anang pag boyot kong glab, nagsiga ratong nakasueat nga "Para sa Maisog" guin suksok nana rong glab ag guindaea imaw sa eati agod magpraktes. Kada agahon, guina daea imaw sa eati agod magpraktis. Umabot rong pyesta sa andang baryo. May paboksing. Nagsamit imaw nga umentra. Suksok nana ratong glab, nagdaug si Sanny. Royon ro umpisa ko anang pagsikat eon man bilang isaeang ka boksingero. Nakaabot imaw sa iba – ibang lugar agod mag hampang.
Sa kada pagdaug nana, ana nga guina tau–kay Nanay na ro primyo ag dinag-an agod ipakaon sa mga onga nga naga warang sa kalye. Naeo-oy imaw sa mga onga nga natunuran it adlaw ag na agahan una sa kalye. Mabahoe man ro anang guin bulig sa pag patindog it eskwelahan una sa anang barangay.
Maskin sikat eon si Sanny, owa guid mag bag-o ro anang batasan. Indi nana malipatan ro bilin ko nagtaliwan nga ama nga rong manggad umaeagi eamang, ogaling rong mayad nga pamatasan ag paki bagay sa tawo hay owa it pagkaduea. Bilang pagpasaeamat sa anang guin bulig sa andang barangay, guin padunggan imaw. Isaeang ka monumento rong guinpatindog para kana. Sa idaeum ko nagaboksing nga estatwa, naka sueat rong tinaga nga indi ni Sanny malipatan, "Para Sa Maisog". /MPmailto:madyaas_pen@yahoo.com

No comments: