Sugilanon Ni Tita Linda

Si Liloy Ag Rong Alilang Ayam

May nagahambae nga mas mayad pa ro ayam nga amigo, ko amigong tawo. Naga bantay sanda kimo sa baeay ag owa naga traidor. Sandang ayam hay naga unong kimo sa tanan nga oras.
May hapueot nga tiyo si Liloy. Naga kurog sa kaeamig ag sa kagutom. Anang guin oba ro anang eambong agod puston ro tiyo. Pagkatapos nana it libod ko anang dyaryo, guin uli nana ro tiyo. Anang guin pakaon it mainit nga noodles hasta naulian. Kada agahon, guina daea nana ro tiyo sa paghatod it dyaryo sakay sa anang bisekleta. Anang guin pangaeanan nga si Bitik.
Sabado, owa it klase, nag-adto sanda sa baybay agod maghampang. Sa andang pagpanaw, may hapueot sanda nga sigay sa baybayon. Andang guin uli ag isueod sa garapon nga may mga bosoe nga hapueot nana sa karsadahon. Dayon nagpahuway.
Samtang naga katoeog ro daywa, may tumugpa nga “spaceship” maeapit sa andang baeay. Halin sa ibang planeta ro spaceship ag may guina usoy nga sigay nga nawigit kuno ko andang prinsesa sa anang pag hinampang. Paagi sa andang monitor, hatunton nanda kon siin ro sigay.
Nag eahay si Bitik. Hakibot ro mga “Aliens.” Indi sanda makasueod sa baeay ni Liloy. Nagpanaw anay sanda. Nagtubo man ratong bosoe ag nangin baeagon nga guin palibutan ro baeay. Tongod karon, indi makasueod maskinsin-o. Nagbunga dayon dayang baeagon ag nangin pagkaon nanday Liloy. Ko ulihi, si Bitik ro guin sugo ni Liloy sa paghatod it mga dyaryo ag ro bayad hay guina butang sa puyo nga naga kabit sa anang li-og.
Bumalik eon man ro mga alien, daea ro mas pwersado nga gamit ag saeakyan. Ogaling hakibot sanda kat makita nga guina libutan it baeagon ro baeay. Guin pabombahan it kaeayo ro baeay ni Liloy, ogaling may tumunga nga robot nga may mas pwersado nga armas. Guin paarakan sanda it bala ag nag paeagiw ro mga alien. Owa eon sanda magbalik.
Ratong robot hay owa it iba kundi si Bitik. Guin padaea imaw halin sa planetary Rox ay sayod sanda ko plano it mga alien nga sakupon ro planetang Earth. Guin saburan nanda it sigay agod mangin giya kon siin sanda matugpa. Pag kasayod ko planetang Rox, guin padaea nanda si Bitik nga isaeang ka ayam agod magbantay sa pag-abot ko mga taga planetang X-Zur. Guin sunog nanday Liloy ratong mga sigay agod indi eon magamit.
Umpisa kato, nangin taga-bantay nanda si Bitik. Naga anyong robot eamang imaw kon indi nana makaya ro kaaway.
Kat matawhay eon sa lugar ni Liloy hay nag eaong nga magbalik si Bitik idto sa andang planetang Rox. Nakapag-asawa man si Liloy it isaeang ka mabuot nga asawa ag may daywa eon sandang mga onga.
Kon hidlawon si Liloy sa anang amigong si Bitik, idto nana guina tangda-a sa eangit ro itsura ni Bitik kaibahan ko mga Bituon nga naga hibayag kana. /MP