Sugilanon Ni Tita Linda

Tita Linda Belayro

Parabula It Tatlong Ka Kahoy

Dungan sa pagsubeak ko adlaw, agahon pa. Dungan man nga nag-bugtaw ro tatlong ka maintok nga kahoy. Sam-tang naga painit sanda sa silak, nag sueogiran sanda ko andang mga handum.

Hambae ko unang kahoy, "Kon ako mag-bahoe, bu-ot ko nga pukanon, obrahong tabla ag obrahon nga pinaka sadyaan nga katre. Ro anang kasadya hay angay ag bagay nga eogban it isaeang ka hari.

Nagsabat man ro pangaywa, "Kon ako magbahoe, bu-ot ko man nga obrahon ako nga pinaka madasig nga barko. Rayang bapor hay paga dumaeahan it pinaka maaeam nga kapitan.

Indi man magpadaug ro pangatlo. Sumabat imaw, "Kon ako magbahoe, bu-ot ko man nga obrahon ako nga pinaka mataas nga baeay. Tanan ro mga tawo hay maga tangda kakon ag ako paga dayawon.

Matsa owa magbuhay, tumaliwan ro mga dinag-on. Mabahoe ag mataas eon ro mga kahoy nga pukanon agud orahon kon ano man nga mga bagay nga mapili-an it tag-ana.

Ogaling, taliwas sa handum it tatlo ro natabo. Ro katre para eogban it hari hay nangin pasungan nga sabsaban it mga hayop. Maskin pasungan imaw hay guin obra nga katre ko eapsag nga si Hesus. Guin butangan it mga dagami it paeay ratong pasungan agod maghumok nga eogban ko atong Manunubos.

Ratong pinaka madasig nga barko hay nangin maisot nga baroto. Ogaling rayang baroto ro guin sakyan ni Hesus sa anang pag eakbay agod mag wali sa mga tawo samtang ro mga tawo hay sa takas. Raya man ro baroto nga guin sakyan kon paano mangin epektibo nga mangingisda it tawo.

Rato man nga bu-ot mangin mataas nga baeay hay guin obra nga krus. Raya ro krus nga guin eansangan ko atong Manunubos. Samtang nagatindog ro krus nga may Kristong naka eansang, tanan hay naga tangda kana sa pagkilaea, paghinoesoe ag pag-pangamuyo it kapatawaran tongod sapagtubos nana ko atong nga kasae-anan.

Tanan ro tawo hay may mga handum. Bukon it maeain ro naga handum, ogaling indi kita mag-handum it masyadong mataas tongod kon ano ro kataas ko atong handum hay imaw man ro kasakit ko atong pagka hueog nga indi eon kita makabangon.

Ro handum hay imaw ro naga tueod sa tawo nga magporsige, ogaling paino-inohon naton pirmi nga naga tapak kita sa eogta ag indi pagsundan it bugae tongod ro bugae ro naga daea sa tawo nga lipatan ro anang guin halinan. /MP