Sugilanon Ni Tita Linda

Ni Tita Linda Belayro

Ro Patay Nga Buhi

Sa andang barangay, sangka daeaga si Soledad. Owa guid it naga pangasawa kana. Busa, kada hapon, kon maghalin imaw sa eskwelahan nga guina maestrahan, una imaw anay naga agi sa bungsod nahamtang sa idaeum it mangga. Owa ro mga tawo nakasayod nga ro bungsod gali hay baeay it mga duwende nga guina dumaeahan ni Haring Olex. Si Haring Olex ro naka kita sa pag agi perme ni Soledad ag tinubuan imaw it kaila sa daeaga.

Isaeang adlaw, masakit ro oeo ni Soledad, ngani umuli lang imaw. Owa eon imaw naka ilis it eambong ag dayon nag adto sa katre agod mag eobog.

Ko gabi-i ngaron, guin daea ro anang espiritu idto sa lugar nanday Haring Olex. Idto nag pinamasyar sanda kaibahan ko mga kadaeagahan ag kabinataan. Parabil mag pamaeo ro mga manok, guin uli si Soledad ni Haring Olex.

Pagkaaga, ga-oy nga ga-oy si Soledad hasta owa imaw naka adto sa eskwelahan. Imaw ro naga katabo kada gabi-i kay Soledad hasta nag as-as ro anang eawas. Guin daehan imaw it manog boeong ag idto hasayran ro bilog nga kamatuoran. Ro espiritu ni Soledad hay bihag it mga dwende ogaling ro anang eawas hay nahaaywan pa nga matsa patay.

Nagtinangis ro anang mga pamilya. Bu-ot nanda nga bawi-on si Soledad. Ro mga manog boeong nga maeoya ro tu-ob hay naga kamatay, busa owa eon it naga baton sa mga manog bueong nga mag boeong kay Soledad. May naghambae nga higtan it pueang tela ro anang siki ag eambongan it puea agod indi maka eapit ro mga duwende kay Soledad.

Kat oras nga sueangon eon si Soledad, napan uhan ko hari it mga duwende nga may puea nga putos ro anang eawas. Nagsangag ro duwende. Indi imaw maka eapit kay Soledad kapin pa ay madamoe ro aso halin sa sinunog nga kamangyan.

Nagbugtaw si Soledad ogaling owa it hakilaea nga tawo sa anang palibot. Owa man imaw naga guwa nga matsa may guina kahadlukan. Kon mahayag ro buean, naga guwa imaw ag naga hampang sa kalye nga kaibahan ko ibang mga onga nga sa anang pagtan-aw hay mga binata ag kadaeagahan idto sa kaharian ni Haring Olex.

Makaron, buhi pa si Soledad. Kon hin-uno magbalik ro anang hustong paino-ino, owa it nakasayod. Owa naduea-i it pag eaum ro anang mga guinikanan. /MP