Ni Tita Linda Belayro
Si Entong Ag Ro Nakapresong Prinsesa
Abong alilang hayop si Entong ogaling mga pispis ro anang pinaka paborito. Ko gabi-e ngaron, may nagtugpa nga isaeang ka pispis nga may higot nga nakasueat sa anang siki. May nakasueat sa tela nga "Tabangi ako…nakapreso ako sa ikapitong bukid". Naka sueat pinaagi sa duro ro sueat. Bu-ot nga buligan ni Entong ro naga pabulig, ogaling siin imaw masakay.
Samtang naga eaha it ihapon si Entong, nag- paeapit ro pispis ag maangan-angan, nagbahoe ro eawas it pispis ag nag buk-ead ro mabahoe nga pak-pak. Owa mag uyang it tiyempo si Entong. Sumakay imaw sa likod it pispis ag eompad ro pispis paadto sa ikapitong bukid.
Parabil sanda maka-abot sa ikapitong bukid, nag eopok ro bulkan ag naga buga it lava. Nagbuga it mga bato nga naga baga, ogaling maabtik man ro pispis sa paglinikaw. Nakaabot sanda sa ikapitong bukid ag guin tuka ko pispis ro higot it pwertahan. Naka sakay eon ro prinsesa ag si Entong sa likod it pispis, ogaling nabugtaw ro higante ag guin eagas sanda it higante. Madali eon lang sanda maabotan it higante. Pumaibabaw ro pispis sa likod it mga gae-um, busa nag uean it mabaskog ag nagbaha. Mabaskog ro sueog ag nadanlog ro higante sa mga bato. Natumba imaw ag tumama ro anang oeo sa bato ag namatay. Nakaabot sa kaharian ro prinsesa.
Nag eain ro dagway it pispis nga isaeang ka prinsipe. Guin taw-an imaw it panyo ko magueang nga naga pakalimos agod mabuligan ro prinsesa nga anang igmanghod nga guin preso it higante. Bilang pasaeamat, guin pakasae si Entong sa prinsesa. Nagbisita imaw sa anda ag nangin malipayon ro anang pamilya. /MP
No comments:
Post a Comment