Thursday, November 24, 2011

Sugilanon Ni Tita Linda


Ni Tita Linda Belayro


Baston Ni Moses


Isaeang ka propeta sa dumaan nga tipan si Moses. May guina huptan imaw nga baston nga guin taw-an it gahum ko Diyos agod magamit sa pagdumaea sa mga Israelitas samtang naga paeagiw halin sa Ehipto. Indi mabaton ko Paraon nga maghalin ro mga Israelitas sa anang lugar tongod naduea-an imaw it abo nga mga olipon nga naga serbisyo kana.


Samtang naga binaktas ro mga Israelitas sa disyerto, duro guid ro andang kauhaw. Naubos eon ro andang baeon nga tubi ag pagkaon. Sige man ro andang reklamo ag pagbasoe kay Moses. Hasayran ni Moses ro andang baeatyagon. Nag usoy imaw it bato sa kilid it daean ag anang guin tuslok ro bato pagkatapos it pangamuyo.


Bumusawak ro matin-aw ag maeamig nga tubi. Naghugyaw sa kalipay ro tanan. Pagtunod it adlaw, owa eon man sanda it maka-on. Nangamuyo eon man si Moses ag nag uean it mana halin sa ibabaw. Nangin humay nanda ro mana. Pagkaaga, abo man nga nagdapo nga pugo sa andang lugar, busa may guin suea ro mga Israelitas. Nakaabot sanda idto sa baybayon it Pueang Dagat. May habatian nga singgit si Moses. Una eon ro mga soldados it Paraon nga naga eagas kanda. Indi eon sanda makabalik ag owa eon it malikawan.


Inalsa ni Moses ro anang baston ag nangamuyo. Golpeng nagpihak ro dagat. Nagtabok ro mga Israelitas hasta nakaabot sa pihak nga pangpang. Husto guid lang nga naga tabok man ro mga soldados ag bumalik ro tubi. Nag- kaeonod tanan ro mga soldados ag nakalibre tanan ro mga Israelitas. Makaron, padayon sanda sa pagpaabo sa lugar nga guin promesa kanda it Diyos. /MP

No comments: