Sugilanon Ni Tita Linda

Ni Tita Linda Belayro

Ro Bugaeon Nga Fir Tree

Ro Fir Tree ro pinaka mataas sa tanan nga kahoy nga naga tubo sa sangka lugar nga kagueangan. Busa, tanan hay nahikaw kana tongod sa sadyaan ro tabas ko anang puno ag mga dahon. Bangod kara, nangin bugaeon imaw. Owa it guina obra imaw kada agahon kundi hibaygan ro mga tanum nga naga kunoe ag mga balikutot ro mga sanga. Sa owa magbuhay, tinak-an it pinamati ro isaeang ka maisot nga tanum ag naghambae;

"Kon ako kimo, indi ka dapat magpabugae. Guin tao eon kimo ro tanan nga grasiya, dapat magpasaeamat ka sa nagtuga kimo", padumdom ko maisot nga kahoy.

"Paano mo maintindihan ro isaeang ka kahoy nga kon siin ro pinaka punta ko akong sanga hay nakaabot idto sa eangit?", pagpabugae guihapon nga sabat ko Fir Tree.

"Maghueat ka, hambae it maisot nga kahoy. Kabay nga iya pa ako kon may mag abot nga manog pokan it kahoy. Sigurado ako nga handumon mo nga mangin maisot nga kahoy pareho kakon."

Tumaliwan ro sang dominggo, may nabatian sanda nga hagunong it mabahoe nga saeakyan. Matuod, umabot ro mabahoe nga truck. Rondaya gali ro naghakot it mga manog pokan it kahoy. Guin pili nanda ro mga sadyaan nga tabas it kahoy agod obrahon nga tapi para sa simbahan ag tindahan parabil pokanon. Hapilian nanda ro Fir Tree.

"Hayra ro sadyaan nga puno, angay guid ra nga obrahon nga poeongkuan it Obispo," hambae ko manog pokan.

Guin umpisahan eon it pagpokan ro Fir Tree. Kada dueot sa anang puno hay naga toeo ro anang eoha (tagok) sa kahapdi. Parabil imaw naputoe ag natumba, nagbalikid pa imaw sa maisot nga puno.

"Husto ka gid amigong puno, owa guid it adtunan ro pagkabugaeon. May kutod man gali ro tanan", ea-ong ko Fir Tree. /MP