Thursday, September 12, 2013

Sugilanon Ni Tita Linda

Ni Tita Linda Belayro

Bueawan Sa Bangâ

Isaeang ka simpli nga babaye si Sarita. Kaibahan ro anang guinikanan, idto sanda naga estar sa kabukiran. Kada agahon, naga sag-ob imaw sa bubon sa ubos it bukid. Malisod ro tubi sa andang lugar ag mabahoe nga sakripisyo ro guina obra it mga tawo agod maka inom eamang it tubi. Ro iba hay naga tapas it butong ag guina obra nga sag-ob. Kon may oean, andang guina saeod sa uean agod makatipon eamang it tubi.
 
Isaeang adlaw, agahon pa nana-og si Sarita daea nana ro eagi nga banga agod mag sag-ob it tubi. Samtang guina tinakos nana ro tubi sa anang banga, may magueang nga babaye ro nagpaeapit sa isaea nanang kaibahan. 
 
“Ineng, kon mahimo nga paimnon mo ako ko imong tubi sa bangâ?” pakitlo-oy ko magueang. 
 
“Ay lola guina hueat ko akong pamilya ro akong tubi ngara. Basi kon matapnan mo pa man it masakit ro akong tubi. Sa iba ka eon lang mangayo”, pamalibad ko babaye.
 
Pagkabati, naeo-oy si Sarita sa magueang. Paimnon ko ikaw”, pagdahan ag sampit ni Sarita sa magueang. Dali-dali mat-a nga nagpaeapit ro magueang ag nag inom sa bangâ ni Sarita. Abo guid ro nabuhin sa tubi ni Sarita. Ogaling owa it bale. Iba ro anang nabatyagan sa anang tagipusoon. 
 
“Saeamat guid, Ineng. Katuead guid ko matin-aw nga tubi ro imong tagipusuon. Bendisyonan ka it grasya nga katupong ko imong mayad nga binohatan”, pasaeamat it magueang. Dayon mat-ang nagpanaw ro magueang. Guin sundan it pamantaw hasta naduea sa panueok ni Sarita. 
 
Guin dugangan nana it tubi ro anang bangâ hasta napuno eon man. Dayon nagpadueong sa andang baeay sa ibabaw it bukid. Pag abot nana sa andang baeay, hangawa imaw nga ham-an naga siga ro anang bangâ. 
 
Ro maka ngawa-ngawa pa hay maskin man-o it abo ro andang pagtinakos hay owa naastani ro sueod nga tubi ko andang bangâ. Halin kato, owa guid naastani ro tubi maskin una sanda naga bo-oe ko andang guina eaba, guina paligos, ag guina inom sa rondayang bangâ. Ro banga ni Sarita hay nangin bueawan. Owa sanda nawawad-i it tubi halin sa bangâ. 
 
Ro pagta-o ni Sarita sa magueang hay modelo ko pagka maatag ag owa it guina pili. Kon sin-o man ro buligan, kapares ni Sarita, kinahangean nga mangin maatag man kita sa atong isig katawo. 
 
Tongod kara, guina grasyahan kita it Diyos ko tumaeagsahon nga kalipay kon makabulig kita nga owa it pagpili maskin sin-o.
 
Bulahan kuno ro magbulig kaysa sa maga baton Kabay pa nga mangin kapareho kita kay Sarita: maeoeoy-on, matinumanon, mapainubsanon ag naga batyag sa kakueangan it atong isig katawo. /MP

No comments: