Sugilanon Ni Tita Linda

Ni Tita Linda Belayro

Singsing Nga Tantanan

Naga pamueot it basura ro trabaho ni Seryo. Ro anang kabak-eanan hay guina bakae nana it pagkaon para sa anang masakiton nga ina. Ro sobra hay guina bakae man it boeong ko anang ina. Kueang pa sa andang panggasto ro guina kita nana ogaling owa man imaw it mahimo, busa guina ti-is lang nana ro kabaho ag kainit sa pagkinae-kae it basura. 

Isaeang adlaw, may nakita imaw nga eagi nga singsing. Guin butang nana sa anang boesa ag sige mat-a ro anang pagkinae-kae. Ka’t masyadong init eon ro adlaw, dumeretso imaw sa suki nga junk shop agod ibaligya ro anang natipon nga basura. Kueang pa ibakae it pagkaon ro anang kabak-eanan o kita. Maangan angan, habatyagan nana nga naga init ro anang boesa. Guin hulikap nana ro anang boesa. Ro anang singsing gali ro naga init. 

Guin hap-eos nana ro singsing ag may nagtunga nga isaeang ka mabahoe nga alibang-bang. Naghambae ro alibang-bang, kon ano ro anang pangayo. 

“Pagkaon, pagkaon, ro kinahang-ean ko tongod owa pa naka kaon ro akong ina”, pangayo ni Seryo. Maangan angan, nag gueowa ro mga kaldero nga puno it mga putahe. Sa kalipay ni Seryo, hay guin tawag nana ro kutob naga kae-kae man it basura ag guin pakaon. Umpisa kato, permi eon nga guina pakaon ni Seryo ro anang mga kaibahang basurero. 

Ko isaeang gabi-e ngaron, guin sugid nana ro tanan sa anang ina. Guin plano nanda nga mangayo it baeay sa singsing tongod naga toeo eon ro andang baeay kon mag oean. Pagkaaga isaeang ka mabahoe nga baeay ro naga tindog sa lugar ni Seryo. Nagpatindog sanda it junk shop. Halin kato, nag manggaranon sanday Seryo. Kada paskwa, naga pahaum sanday Seryo it pagkaon para sa andang bisita. 

Ro owa it baeay nga naga estar sa skwater hay andang guina patindogan. Natuman eon tanan ni Seryo ro andang handum, busa nag ea-ong eon imaw sa singsing nga mabuligan man ro ibang tawo. Pagtaliwan it pasaeamat, naduea dayon ro singsing. Kon sin-o eon man ro makabaton kara, owa it nakasayod kundi ro singsing eamang. /MP