NAG-AEAM SAKAY SA ANWANG

       Si Bitoy hay isaeang ka ungang ilo sa ina. Pagkamatay ko anang ina, gin bo-oe imaw ko andang kahilapit nga baeay agod mag bantay sa andang mga anwang. Si Bitoy ro naga daea it pagka-on sa eanas kon may pa-ubra si Mang Santos sa anang eanas nga gina umahan.

    Ko isaeang agahon ngaron, gin sugo si Bitoy nga magbakae it suea para sa mga tawohon ni Mang Santos. Pag agi nana sa eskwelahan, nagpundo anay imaw it madali. Nabatian nana rong pagkanta ag pagbasa ko mga unga.

    “Kunta kapares man ako kanda. Anteguhan magsueat, maghuyap ag magbasa. Ano abi ay namatay si Nanay ngani owa ako nakapadayon it pagtuon sa eskwelahan. Hasta eamang ako it Grade One”. Masubo nga hambae ni Bitoy. 

    Sa anang pagbalikid, hakita nana si Amboy nga Dyanitor it eskwelahan nga ginasug-an nana ro mga eaging libro. Dali-dali imaw nga umadto kay Amboy ag gin pangayo nana ro ibang libro nga owa pa masunog. Pagka-uli ni Bitoy sa andang baeay, gin ta-o nana ro mga gin pamakae. Samtang gina eaha pa it kusinera ro pagkaon, sumakay imaw sa anang paboritong anwang.Samtang naga pahangeab si Bitoy ko anang anwang, sige ro anang pagbinasa ko mga libro. Imaw nga imaw ro anang gina obra kon idto imaw sa eanas.

    Umagi ro isaeang ka saeakyan. Sakay it mga turista nga naga pamasyar maeapit sa andang eanas. Pagkakita  nanda kay Bitoy nga naga hapa sa likod it anwang samtang nagabasa, naila gid sanda mag tan-aw. Gin Boe-an nanda it retrato ag gin padaea sa andang mga amigo idto sa iba’t ibang Nasyon. 

    Makataliwan ro sang buean, may mga reporter ag retratista nga umabot. Gin interview si Bitoy. Nag eapta ro balita hanungod kay Bitoy nga nagabasa samtang naga bakiro it anwang. Naging sikat si Bitoy. Tungod kara, gin buligan pa imaw agod makapadayon it pagtuon. 

    Naging cover it mga magazine si Bitoy nga may nakasueat “The Pinoy And His Carabao”. Gin padaea imaw sa Amerika agod idto patun-on. Nalipay man du anang ama bangod sa nag abot nga swerte ko anang unga.

    Pagkataliwan it ap-at nga dag-on, nagbalik si Bitoy iya sa Pilipinas. Isaea eon imaw nga nagtapos sa bantog nga kolehiyo sa Amerika. Abo ro nag kangay kana nga magturo sa bantog man nga kolehiyo sa Pilipinas. Nangin propesor si Bitoy. Gin kilaea imaw nga sangka mangin aeamon sa andang lugar. 

    Gin pamatud-an ni Bitoy nga abo nga paagi rong tawo kon bo-ot nanda nga mag-aeam. Maskin owa imaw sa eskwelahan, may sarang imaw nga mahimo. Ro Diyos hay naga tan-aw sa tawong nagatenguha. Obrahon mo anay ro masaranagn ag ro Diyos rong maga dugang ko tanan./MP