Sugilanon Ni Tita Linda

Ni Tita Linda Belayro

Itom Nga Perlas

Si Alim, isaeang taga eonip it perlas sa kadagatan it Sulu. Ro anang mabo-oe nga perlas, guina bakae kana it mga negosyante ag guina tubu-an it mataas. Busa mas abo pa ro kita ko mga negosyante ko sa mga manog-eonip nga guina pa-on ro andang kabuhi.
Isaeang adlaw, nagmasakit ro anang ama ag kinahangean guid maoperahan. Naubos eon ro kabakeanan ni Alim ko perlas nga anang ha eorop. Guin binakae ko boeong nga reseta sa ospital ro kwarta. Kinahangean nga magpanaw imaw agod mag-osoy eon man it perlas. Nag adto imaw sa eawod. Sige-sige ro anang eonip hasta nakaabot imaw sa may lagusan nga naga tumoy sa kaharian it mga sirena. Hakita nana ro isaeang ka mabahoe nga perlas nga itom ag guina bantayan it isda nga kugtong. May nagpakita kana nga sirena, imaw ro sueogo-on it reyna. Naabutan imaw nga guina tinoeok ro perlas. Guin hambaean imaw nga ro naga handum ko rondayang perlas hay guina higop it kugtong ag mangin toe-an eon lang kon i-eo-ad. Guin sugid nana ro anang handum nga naga usoy man lang imaw it perlas agod may ibaligya para makakita it kwarta agod ibayad sa ope-rasyon ko anang ama.
Guin pabaeonan imaw it reyna it abo nga perlas parabil mag-uli. Guin baligya ro perlas ag guin paboeong ro anang ama. Nag asenso ro andang pangabuhi ag kada adto nana sa idaeum, may perlas nga guina pabaeon kana. Guina buligan man nana ro mga tawo nga naga kinahangean.
Umabot ro tyempo nga naga kahangawa eon kana ro ibang manog usoy it perlas. Guina bantayan imaw kon mag-eonip it perlas. Ko olihi, ka’t nasayuran nana nga may mga naga kahikaw kana, guin sugid nana ro tanan. Nagmunot kana ro anang tatlong ka amigo sa idaeum. Pag-abot nanda, guin sueang-sueang sanda it mga sirena ag syokoy. Guin pakaon sanda ag guin baton bilang mga bisita. Ko gabi-i ngaron, ka’t naga katoeog eon ro tanan, guin plano ko tatlo nga takawon ro perlas nga itom. Ogaling, owa gali naga katoeog ro kugtong. Bato-bato nga guin higop sanda ag sa pilang oras nangin toe-an nga guin eo-ad it kugtong. Guin usoy ni Alim ro anang tatlong ka amigo. Hakita nana ro mga bag-ong toe-an nga guin eo-ad it kugtong. Sigurado nga sanda guid ro mga toe-an ngara. Naeo-oy guid imaw sa anang tatlong ka amigo. Sa anang pag-uli guin pabaeonan imaw it perlas agod ibulig sa pamilya ko tatlo.
Tumaliwan ro mga binoean, naduea eon ro estorya sa tatlong ka mga amigo ni Alim. Nag-eaong ro anang daywang ka igmanghod nga magmunot kana sa idaeum. Guindaea sanda ogaling guin hun-an ni Alim nga indi mag bo-oe maskin ano sa palasyo. Nagpasugot sanda. Sa andang pag-abot, guin sueang-sueang sanda ag naghugyaw ro mga sirena sa pag-abot ni Alim. Parang hari ro pagbaton kana. Sa andang pag-uli, guin pabaeonan pa ro anang mga igmanghod ogaling owa sanda magbaton. Ko olihi, ro prinsesa mismo ro nagta-o kanda ag guin baton ro regalo. Sa andang pag-uli guin suguid nanda kay nanay nanda nga si Alim hay parang hari sa idaeum.
Halin kato, kon mag balik si Alim idto sa idaeum, naga-eaong imaw nga ma adto idto sa idaeum nga idto imaw maga adto sa ibang nasyon. Naga pati ro mga tawo ko anang bang-danan. Kon imaw magbalik, abo ro anang daeang perlas, busa guina bak-ean nana it mga pasalubong sa anang mga kasimaryo. Ka’t magu-eang eon si Alim, nag-eaong imaw sa anang pamilya nga idto eon imaw matener sa idaeum. Guin sugtan man imaw ko anang pamilya bangod abo eon ro anang habulig kanda.
Idto sa idaeum, si Alim ro nangin hari ag hasta makaron, buhi pa imaw bangod owa naga gueang ro tawo kon idto sa idaeum kaibahan ko anang asawang sirena. /MP