Saturday, November 15, 2008

Sugilanon Ni Tita Linda


Ni Tita Linda Belayro
Benguet Lily

Simpleng dalagita si Lilia. Tongod nailo imaw it bata pa, nagtinguha nga mabuhi ag makatu-on paagi sa pagbaligya it mga bueak. Ro syudad it Baguio hay bantog sa mga bueak ag isaea si Lilia nga nakapoeos kara. Isaeang ka Igorota si Lilia ag anad imaw sa negosyo una sa Baguio. Ko olihi, nag-abo ro anang suki. Naka bo-oe imaw it puwesto sa tindahan. Guina adtonan eon imaw it mga negosyante ag ko olihi, guin tawag imaw nga Benguet Lily.
Kon may problema ro mga negosyante, mga guina eopig, guina abuso o guina loko, si Benguet Lily ro andang guina adtunan. Tongod bukas pirmi ro anang paead sa mga kubos, matsa anghel imaw sa mga tawo. Sayod abi imaw kon mauno ro pagiging pobre tongod haagyan man nana eon.
Isaeang agahon, may nagpaeapit kana nga magueang sa anang baraka agod magpakalimos. May mga pama eangdung ro mga taga runa nga negosyante nga indi nimo igasto ro imong buena mano. Ogaling, sa anang kaeo-oy sa magueang, guindawat nana ro anang unang kabakeanan. Pumanaw ro magueang pagkabaton it kwarta. Guinbilinan imaw it batong puti ko magueang. "Indi guid pagduea-on ra", bilin ko magueang. "Raya ro imong premyo kakon. Gamiton mo sa oras it kapigaduhan". Pag-abot it eleksyon, guintibyog si Benguet Lily nga magdaeagan it Alkalde kontra sa dating Alkalde.
Tongod palangga imaw ko mga tawo, nagdaug imaw, ogaling abo man ro anang intrigang naagyan. Bu-ot nga bakeon ro mga botante, bayluhan ro balota, padngan it iwag agod madali ro pagmani-obra sa pagdaya. Ogaling guin hap-an it mga tawo ro mga urna (ballot box) ag guin kandado sa andang alima. Natapos ro pag huyap it boto. Abo guid ro abante ni Benguet Lily. Sa anang pagdumaea sa andang banwa, abo nga mehora ro guin obra ni Benguet Lily. Nangin bukang-bibig ro anang pangaean sa Baguio. Kon ano kahumot ro mga kabueakan, imaw man ro kahumot ko anang pangaean.
Benguet Lily - simbolo it malimpyong pagkatawo, owa it dungis ag hantup nga pagpanerbisyo sa isig katawo. /MP

No comments: