Nightingale
Rong Emperador it China hay ma-ilaon magkolekta it bisan ano mang bagay nga owa it katuead. Ro anang hardin hay guina pangayaw it taga ibang lugar tongod una makit-an ro mga tumaeagsahong tanum nga indi nanda makit-an maskin siin.
Ro anang hardin hay guina estahan it isaeang ka pispis nga owa it tupong ro anang kasadya, kapin pa kon andang mabatian ro anang kanta. Owa guid maka sayod kara ro hari. Hasayran nana ka’t habasa nana sa libro nga guin sueat ko isaeang ka mahistrado nga nakabisita sa anang kardin.
Tongod kara, nagka interes ro hari nga makita rondoyong pispis. Magahaead it premyo ro hari sa kon sin-o mang makadaea kana ko rayang pispis. Ko olihi, may anang kusinero nga naga estar maeapit sa rayang hardin nga naka pamatuod ko royon nga pispis. Tongod malim-pyo ro anang tagipu-suon, ginhambae nana ro pispis. Naghinyo ro kusinero sa pispis nga buligan imaw sa hinyo it hari. Nagsugot mat-a ro pispis. Nagmunot ro pispis sa palasyo. Pag-abot sa palasyo, nag kanta eagi ro pispis. Ro tanan nga nakabati hay napa eoha sa kalipay nga indi nanda maintindihan. Mas malipayon guid sa tanan ro hari.
Umpisa kato, nangin kaibahan eon ro pispis sa palasyo. Kon abo ro problema it hari, anang guina kantahan, kon guina hapo ro hari, naga ugan ro anang pamatyag kon makabati sa kanta it pispis. Ro Nightingale ro nangin balsamo it hari sa adlaw-adlaw.
May nagbisita sa palasyo nga amigong hari, ro Emperador. May daeang regalo imaw nga isaeang ka hawla. Sa sueod hay isaeang ka pispis nga bueawan ro baeahibo ag naga tungtong sa seda nga alpombra. Guin yabihan ro pispis ag kumanta. Sadyaan guid ro anang kanta ag nalingaw guid ro hari. Guin butang guid sa may oeohan it katre ko hari agod madali imaw makatoeog. Imaw nga imaw ro guin obra it hari parabil imaw magkatoeog hay guina yabihan it guardiya agod magkanta.
Ko olihi, owa eon pag inatwa ratong Nightingale busa, eompad imaw ag bumalik sa anang dating guina estahan. Sa kabuhayon eon nga pagkinanta it pabalik-balik ko bueawang pispis, nabugto ro anang kwerdas. Guin padaea sa manog kaayad it relo agod kaadyon. Nag-andar ogaling, basag eot-a ro anang limog. Ka’t owa eon nakabati ro hari it kanta, amat-amat imaw nga nag-eoya hasta nagmasakit. Guin pahaum eon ngani ro anang kabaong ag haum man ro bag-ong magaboeos kana.
Sa pagkasayod ko Nightingale nga ma-iwat ro hari, nag-eopad imaw sa palasyo. Naghapon sa bintana ag kumanta. Ro kanta hay nakaabot sa nagatikha nga hari, ogaling golpe nga nagmukeat ro mata ko hari sa kalipay. Nagbalik ro anang kusog ag kolor ko anang itsura.
“Ea-um ko, guin aywan mo eon ako. Nabighani abi ako ko ratong pispis nga bueawan, ogaling pabalik-balik man lang ro anang kanta. Ikaw hay sayod kon ano ro akong problema. Iba ro imong kanta sa kada paniempo ag royon ro owa sa ratong pispis nga bueawan. Mahimo baea nga indi mo ako pag-talikdan?” paniguro it hari.
“Mahimo, ogaling tuguti man akong maka eopad tongod royon ro akong kalibutan. Maga bisita ako pirmi kimo bisan anong oras. Paga lingaw-lingawon ko ikaw ag paga patoeogon. Royon ro akong regalo kimo bangod mayad ka nga klase nga hari sa imong nasakupan”, promisa it Nightingale.
Pagsueod ko taga bantay agod tan-awon basi patay eon ro hari, hakibot imaw nga nagatindog eot-a imaw ag nagsinghan, “Mayad-ayad nga adlaw kimo!” /MP
No comments:
Post a Comment