Sugilanon Ni Tita Linda

Tita Linda Belayro

Dancing Shoes

Ro tatay ni Karen hay bag-o gid lang abot halin pa sa India. Nag oli imaw pagkatapos ko anang kontrata. Nag hingabot gid imaw nga nakauli parabil mag paskwa. Antes imaw mag-uli, nag bakae anay imaw it pueang sapatos sa isaeang ka magueang. Raya ro anang paskwang guin haead kay Karen.

Malipayon gid si Karen sa pagbaton ko rayang sapatos. Anang guin suk-sok ag tamang tama guid sa anang siki ro sapatos. Nag guwa si Karen ag nagsinaut. Sige ro anang sinaut, sa plaza, sa kaeati-an, hasta idto nakaabot sa sementeryo. Ko olihi, hinapo imaw. Ogaling ro sapatos hay sige pa guihapon nga sinaut. May nag-agi nga pastor samtang sige ro kindeng-kindeng ni Karen. Hakita nana si Karen nga lupay-pay eon sa kaga-oy. Guin buligan imaw it pastor agod nga makatindog. Guin hukas ro anang sapatos agod maka pahuway ro anang siki. Nakabatyag it pahuway si Karen. Nag-uli imaw nga bit-bit ro anang sapatos.

Madali eon lang ro paskwa. Peho guid nga maga simba sanda ko anang pamilya. Hamadla eon imaw ko natabo ko nagtaliwang adlaw. Bisperas it paskwa, nagsimba sanda ag buot ni Tatay na nga isuk-sok ro anang bag-ong sapatos. Agod indi imaw pag akigan ni Tatay na, anang guin suksok. Pag-abot sa simbahan, nagsampit eon man ro sapatos nga magsaut. Tumindog imaw ag nagsaut. Hakibot ro anang ama ag ina. Pati ro mga tawo hay nag tinan-aw kana. Gumuwa imaw sa liwan ag padayon ro anang pag sinaut. Indi eon nana mapunggan. Naka abot imaw sa kagueangan. Sa uwa magbuhay, nakasub-eang imaw it mangangahoy. Naghinyo imaw nga putueon ro anang siki. Ko una, indi mag potoe ro tawo bangod kahoy eat-a ro anang guina potoe, ogaling nagpakitlo-oy gid si Karen.

Pinotoe ko manga-ngahoy ro anang siki, ogaling ro sapatos hay sige pa guihapon sa pag sinaut. Nakaabot ra sa may kumunoy o quick sand (hunod). Idto nahueog ro sapatos ag tinoeon da paidaeum. Nag-oli si Karen nga puro dugo ro anang siki. Guin suguid nana ro natabo sa anang pamilya. Naeooy guid it duro ro anang ina ag ama. Para maka pahuway imaw ag malipatan ro tanan, guin daea imaw sa convento ag idto guin tatap imaw it mga madre. Hasta it makaron, una pa si Karen naga saklay. Ogaling malipayon imaw nga naga serbisyo sa Diyos. /MP