Sugilanon Ni Tita Linda

Ni Tita Linda Belayro

Sa Kuko it Agila

Mapintas nga Amo, tatay, ag tawo si Don Agaton Aguila. Tag-ana imaw it Hacienda Aguila. Ana ro pinaka maeapad nga eogta sa andang banwa. Bu-ot nana nga bakeon tanan ro mga kadueon ko anang eogta. Guin pilit pa ngani nana nga papermahon sanda. Ogaling indi igbaligya ni Mang Andoy ro andang eogta, sambato sa rayang mga kadueon ni Don Agaton Aguila. Rayang eogta hay irensya abi nana sa anang guinikanan. Tanto pa, rikara imaw naga bo-oe it patubas nga guina gasto sa pagpatu-on kay Nestor nga bu-ot mangin abogado.

Agud mabo-oe ni Don Agaton ro anang gusto, guin taw-an nana ro mag-ama it abong kwarta. Nagpamalibad guihapon ro mag-amang Andoy ag Nestor. Sa kaugot ni Don Agaton, guin bayaran nana ro mga pulis agod pabangdan nga naga baligya it droga si Nestor. Owa it eabot pa kara, guin pabangdan pa imaw nga nagpanakaw sa baeay ni Don Agaton.

Tanan hay butang-butang eamang. Ogaling, guin sueod sa karsel si Nestor. Sa sueod it karsel, idto si Nestor naga binasa ko anang libro. Tag naga pahilangupon ro eksamin, naghinyo imaw nga mabu-oe it eksamin. Guin sugtan man. Guin pa guardyahan pa imaw it daywang ka pulis sa poeta it kwarto. Pagkatapos it eksamin, nagbalik eon man imaw sa karsel.
Makataliwan ro pilang buean, nagguwa eon ro resulta it eksamin. Isaea si Nestor sa mapaead nakapasar. Guin tun-an nana ro anang kaso ag imaw mismo ro nagdepensa sa anang kaugalingon kada vista sa korte. Pagkatapos it vista ko kaso, napamatud-an nga owa si Nestor it saea. Guin basura ro kaso. Ro masubo eang hay guin pinaperma ni Don Agaton ro mga tag ana it eogta ag guin bayaran nga bukon it kueang sa kaeapad it eogta.

Umpisa kato, si Nestor eon ro guina daeaganan it mga tawo sa andang problema. Guin sukot nanda si Don Agaton ko kabilugan nga kantidad ko andang eogta. Guin negosyo nanda ro kwarta ag naghalin sanda bilang mga trabahador ni Don Agaton. Ro mga tawo hay nagpasaeamat guid it abu kay Nestor tongod naka libre eon sanda sa kuko it Aguila. /MP