Ni Tita Linda Belayro
Si Makaspar Ag Ro Mga Amô
May isaeang ka tawo nga guina hingaeanan kay Makaspar sa sangka lugar sa Panay. Naga estar imaw kaibahan ro anang asawa sa kagueangan. Abo guid ro andang tanum nga saging. Ro anang kasagingan hay guina pangayao it mga amô. Ko una bukon pa sanda it apektado ko mga amô. Ogaling ko olihi hay owa eot-a it habibilin para kanda.
Isaeang adlaw, samtang naga kinaon it saging ro mga amô, naghinyo si Makaspar nga pabinlan man sanda para andang kan-on. Guin hibaygan eang imaw it mga amô. "Ikaw ro nagtanum ko mga saging ogaling naga kahueogan nga ikaw man ro maga kaon ko prutas?" Pangutana ko mga amô.
Sa anang kaakig, nag obra imaw it mga patibong ag guina pana pa nana kutob sa anang makita, ogaling sige pa guihapon nga binalik ko mga amô ag mag kinaon it bunga it saging.
Nag paino-ino it ideya ro mag-asawa. Agahon pa, napukaw ro mga amô tongod sa pagtinangis ko asawa ni Makaspar.
"Ay! Patay eot-a si Makaspar. Owa eon it ga tanum it saging kara. Dali kamo mga kaeapit-baeay, tan awa ninyo ro anang eawas ay indi eon ninyo imaw makita.
Habatian ko mga amô. "Namatay kuno si Makaspar. Mayad ron ay owa eon katon it ga inga. Maka pagusto eon kita". Dali, maadto kita ag tan-awon ro patay. Sirado ro mga bintana ag puetahan. Sumaka sanda sa hagdanan sa likod it baeay ag umagi sa makitid nga puetahan. Hakita nanda nga naga tinangis ro asawa ni Makaspar.
Nalipay it duro ro mga amô tongod owa eon it maga inga kanda sa pagkinaon it saging nga bukon it andang tinamnan. Owa sanda makasayod nga buhi si Makaspar ag pahito man lang rato ko mag asawa.
Ka’t tanan nga mga amô hay una eon sa sueod it baeay, golpeng sinarhan ko babaye ro puetahan. Golpeng mang bumangon si Makaspar. Bino-oe nana ro sanduko sa anang katreng guina eogban ag guin pang tigpas nana ro mga oeo it mga amô.
Imaw man ro inobra ko anang asawa. Tanan ro mga amô nga hakulong sa sueod it baeay hay hapatay.
Umpisa kato, owa eon it nagkinaon ko mga saging ni Makaspar. Nagkabuhi it malinong ro mag asawa. /MP
No comments:
Post a Comment