Tita Linda Belayro
Orpheus Ag Euridice
Si Orpheus hay isaea sa mga Diyos it Olympus nga guin regaluhan it magical power ni Zeus tongod sa anang kabuot ag pagka matinumanon. Ro magical power hay ro maka obra it mga tula (luwa) ag musika sa anang plauta. Ro makabati sa anang gina sambit nga hambae ag tono hay malipatan nanda ro andang kalisud ag kasubo.
Ro mga may problema nga tawo hay naga bisita ag naga haead sanda it bueak kay Orpheus sa anang rebulto. Bisan ro mga mapintas nga sapat hay naga hugop kon makabati ko anang musika.
Ko adlaw ngato, samtang naga tukar si Orpheus ko anang plauta, nag agi si Euridice, isaeang ka mortal. Nabighani imaw sa musika ni Orpheus, busa anang guin usoy kon siin nagahalin ratong musika. Pagkakita kana ni Euridice, nabo-oe ro anang kaila tongod bukon gali it gwapo ro binata sa anang pag tueok. Ogaling si Orpheus hay naila ta it duro kay Euridice. Nagdaeagan ro babaye agod maglikaw kay Orpheus. Sa anang pag-dinaeagan, naka tapak si Euridice it sawa ag inangkit imaw hasta namatay.
Guin sundan imaw ni Orpheus hasta sa Hades, kon siin idto ro mga espiritu it mga patay hay guina daea. Guin hinyo ni Orpheus kay Persephone, ro reyna it mga patay, nga pabalikon sa eogta si Euridice. Guin pasugtan imaw ni Persephone sa kondisyon nga mauna imaw ag indi pagpabalikon o tan-awon si Euridice. Kat naga pabalik eon sanda sa eogta, naga duda si Orpheus nga basi owa naga sunod si Euridice kana busa, anang guina inadwing. Kadungan sa anang paglingat, hakita nana it madali eamang si Euridice ag dayon naduea.
Duro guid ro anang pag no-oe. Halin kato, owa eon nabati-i ro plauta ni Orpheus. Sa sobrang pag-higugma nana sa daeaga, nangin hangin imaw ag kon amat mabatian naton ro anang panaghoy sa mga katamnan o kabukiran. /MP
No comments:
Post a Comment