Sugilanon Ni Tita Linda

Perfedia,
Daldalerang Kabayo

Nakakita eon baea kamo it kabayong naga hambae? Kon owa pa, basaha raya.

Sa isaeang ka hacienda, guina panag-iyahan ni Don Pepot, may isaeang ka solterito nga manog tatap, kon katon pa, bakero it kabayo nga pangkarera ni Don Pepot. Ro anang ngaean hay si Moreng. Ro trabaho ni Moreng hay magpakaon it lasaw ag bitamina sa mga kabayo nga guina padaeagan sa karera.

Ro paboritong kabayo ko Don hay si Golden Bell. Separado ra imaw sa ibang kabayo tongod raya ro naga tao it abong kwarta kay Don Pepot.
Sa katapusan nga karera, napaki ro paboritong kabayo ag inapok ro naga sakay nga ginete. Guin paboeong si Golden Bell ogaling, mabuhayan pa parabil makabalik sa karera.

Masubo guid si Don Pepot sa nagtuhaw nga disgrasiya. Samtang naga pakaon si Moreng sa ibang kabayo, nakabati imaw it may naga hambae.
"Dali-dali-a man rekara ay gutom nga gutom eot-a kami", sinana ko limog. Sin-o ro naga hinambae ngaron ay owa man it tawo? Kon imahinasyon eamang ra hay basi nagsaea eang imaw it pamati.

Naduhungan imaw, si Moreng. "Hay, ham-an it naga tinindog ka pa rikaron?" Padayon nga naghambae ro limog. Paglingot nana hay owa man it tawo kundi kabayo ro anang hakita.

"Ikaw baea ro naga hambae?" pangutana ni Moreng sa Kabayo. "Hay sin-o pa abi? Ako si Perfidia, ro daldalerang kabayo. Singhana ro imong amo nga ako ro maboeos kay Golden Bell", hambae it kabayo. Hakibot si Moreng. "Paano makadaug rayang kabayo ay owa man it praktis ag maniwang pa," sa paino-ino ni Moreng.

Guin sugid nana ro tanan kay Don Pepot. Para indi imaw mawad-an it entry sa karera, guin palista nana si Perfidia. Pagkakita ko mga kontra it Don hay guin hibaygan eamang imaw ag ro iba, owa magpusta kana. Guin pilit it Don nga magpusta sa anang kabayo maskin mabug-at ro anang dughan.

Matapos ro karera, na-nguna ag nagdaug si Perfidia. Habalik ro manggad ni Don Pepot. Umpisa kato, nangin bida si Perfidia sa karerahan, ro kabayong daldalera. /MP