Sugilanon Ni Tita Linda

Tita Linda Belayro

Ro Mangunguma Ag Ro Pato

May isaeang ka mangunguma nga bukon eang it duro ro anang mga tanum nga tinoean-on, abo pa guid ro anang mga alila nga kasapatan. Sa tanan nga alila, ro pato ro anang paborito tongod imaw kana ro naga ta-o it itlog adlaw-adlaw. Guina paeobog pa nana ngani sa mahumok nga dagami agod indi mapusa ro itlog pagkaguwa sa buli ko pato. Ana pang guina iwagan kon gabi-i agod indi ig takawon. Bangod imaw man lang ro isaeang naga pangabuhi, guina bilang nanang matsa onga nana rondayang pato.

Isaeang adlaw, bu-ot nanang tun-an it pag eopad rondayang pato kapareho it mga pispis. Tongod ro pato hay may pakpak, ana kunong tun-an ro pato kapares man ko mga pispis. Isaea pa, bu-ot nana nga maka adto man ro pato sa ibang lugar ag maka paniid sa pagpangabuhi it ibang pispis.

Guin daea nana ro pato sa mataas nga bukid ag idto nana guin paeopad. Naka eopad man ro pato. Guindaea nana sa mas mataas-taas pa guid nga bukid ag guin buhian ro pato nga nag eopad ag tumugpa dayon sa ubos. Sa pangatlo, guin daea nana sa pinakamataas nga bukid ro pato agod maka eopad it maeayo. Guinpakita man ko pato ro anang abilidad sa pag eopad. Nag-oli ro daywa nga malipayon bangod natu-man ko mangunguma ro anang handum.

Apang isaeang adlaw, hakibot ag nasubo ro mangunguma nga hakita nana ro anang pato nga ga-oy nga ga-oy sa pagbinaktas pauli. Guin panisgan nana ro pato nga ham-an it nagbinaktas ay kaantiguhan man imaw mag-eopad.

Ro tawo hay guintaw-an it abilidad ag talento bilang regalo katon it Diyos. May mga telento man nga guinturo katon bilang dugang sa orihinal nga talento nga doeot it Diyos. Ogaling ro tawo hay naga katak an mag gamit ko mga talento ngara. Ro iba katon hay naga pakaeomo paagi sa pagpinangayo, owa naga pahueas, ag naga pangabudlay. Ro talento nga owa guinagamita, sa olihi hay maduea man. Kon aton ra nga gamiton, naga daea katon sa kauswagan ag maka bulig pa kita sa atong isig katawo.

Kilaeahon naton ro atong talento. Gamiton naton sa kamaeayran agod mangin malipayon ro Diyos nga nagtao katon kara. /MP