Sugilanon Ni Tita Linda

Ni Tita Linda Belayro

Ro Kampanero Buktot

Mabahoe nga bulig sa simbahan si Ulak bilang kampanero. Kon may gina eobong ngani, guina bunyagan, guina kasae, obra ni Ulak ro mag bagting it lingganay. Uwa pa kato it mga cellphone ag radio. Kon may sunog, o baha, o bagyo, ro obra ni Ulak hay magpatuon sa mga tawo paagi sa pagbagting it lingganay it madasig.

Ogaling maskin nano ro kahugod ni Ulak, owa guid it naila kana nga mag amigo. Owa it eabot nga maeaw-ay ro itsura hay buktot pa imaw. Nahadluk kana ro mga onga. Guina kuno-kuno pa ngani imaw nga aswang o demonyo. Guina baton eon lang nana kon ano ro hambaeon it tawo bisan masakit sa anang pagpamati ag sa dughan.

Kon gabi-i, parabil imaw magkatoeog, idto anay imaw ga tener sa ibabaw it kampanaryo. Malipayon nana nga guina tan-aw ro palibot. Sa anang pamatyag, tag-ana imaw ko bilog nga palibot ag imaw ro hari nga naga pungko sa anang trono. Kaibahan nana ro mga estatwa nga maskin owa naga hambae, kontento eon imaw nga may kaibahan sa anang pag isaeahanon.

Isaeang gabi-i, sa anang pagkatoeog, nagdamgo imaw nga may isaeang ka magueang nga nagpakita kana ag guin taw-an imaw it puting panyo. "Sarang ka nga maka pangayo it tatlong ka bagay nga may kapuslanan dikara sa panyo", hambae kuno ko magueang. Pagbugtaw nana, hapan-uhan nana una sa anang eoyo ro panyo.

Nag paino-ino imaw it madaeum kon ano ro anang pangayuon. Hadumduman na ag ra unang pinangayo: "Taw-an ako it abong manggad agod ibulig ko sa mga tawo. Pangaywa, mayad nga kaeawasan. Pangatlo, isaeang ka babaye nga batunon ag mahaeon ako maskin maeaw-ay ro akong hitsura".

Sa unang hinyo, nag abu ro anang manggad. Guin pang taw-an nana ro mga pobre. Guin paobrahan nana it baeay ro mga eskwater ag guin patindugan it eskwelahan ro mga pobreng mga onga. Naglibog ro oeo ko mga tawo kon siin maghalin ro bulig kanda. Ro mga tawo naga kaigo eon ro pagkaon busa, ro pangaywang hinyo nga mayad it eawas hay natuman man.
Ro ikatlong hinyo hay para sa anang kaugalingon. Kon matapos ro misa, naga panaog imaw ag mag panglimpyo it simbahan kon owa eon it tawo.
May hakilaea imaw nga babaye nga perming ulihi kon mag uli. Busa, kun amat hay ga hambae man sanda. Nagkilaea sanda it husto ag sa owa magbuhay, guin baton imaw ko babaye tongod sa anang kabuot. Ro pagtan-aw ta abi kana ko babaye hay ka gwapo ag tirso eon kun tumindog. Owa magbuhay, nag-pakasae si Ulak ag ro anang amiga. Malipayon imaw tongod hakita nana nga maus-wagon eon ro mga tawo.

Isaeang adlaw, nag eaong imaw sa anang asawa nga magbakasyon idto sa lugar ko anang guinikanan. Nagpanaw si Ulak agod bisitahan ro guinikanan ag mga igbata. Sa bus, hay may nakasakay imaw nga magueang. Guin pangutana kana ro panyo. Rondaya ro magueang sa anang damgo. Tongod sa anang kabuot, guin pahid sa anang oyahon ro panyo. Abo nga hangawa sa anang ka gwapo. Ro anang pag eaum hay guina toeok imaw tongod sa anang maeaw-ay nga hitsura, gali nagbalhin eot-a ro anang dagway ag naduea man ro anang buktot sa likod.

Nag uli imaw sa anda nga owa makilaea eagi ko anang asawa. Guin suguid nana ro tanan. Pagkasayod, nalipay guid it duro ro anang asawa. Hasta it makaron, owa guid it nakasayod nga imaw ro nagbulig sa mga tawo. May bag-o eon nga kampanero ro pari. Nagpangabuhi eon it normal si Ulak ag ro anang asawa. /MP