Thursday, October 29, 2009

Sugilanon Ni Tita Linda


Tita Linda Belayro

Bueak It Dap-dap

Guina patihan it iba nga kon magbueak ro Dap-dap hay matambok man ro mga alimango, kasag, ag sugpo. Matambok man ro mga isda tongod naga bihod. Rikara kita naga paayaw-ayaw it kaon it alimango tongod puno it alige. Ogaling durong cholesterol nga contra sa masakit pareho it eobat ag masakit sa tagipusuon.

Sa pagtaliwan it mga dinag-on, guin tukib ko ro kamatuoran kon ham-an it sa oras nga pagbueak ko Dap-dap hay naga aligianan man ro mga alimango. Ro Dap-dap hay sangka kahoy, may si-it, ag mahumok ro anang kahoy. Sadyaan ra bueak, may pueang kolor. Ra dahon hay korteng tagipusu-on. Tongod sangka "legume" hay naga pa "fertile" it eapok ag maeamig ra handong busa, guina gamit nga "shade tree" sa abaca ag iba pang tanum.

Kato anay nga tiyempo, ro tanan nga hayop sa dagat hay mayad-ayad ro pagsinaeayo. Kada isaea kanda hay sarang maka pamasyar sa maskin siin nga lugar. Ro isda hay sarang man maka saka sa takas ag ro mga pawikan, alimango ag kutob may bagoe nga hayop hay mahumok ro andang eawas. Raya hay oras sa pag-eono.

Isaeang adlaw, nag patawag it miting si Haring Neptuno, ro hari it kadagatan. Abo kuno nga reklamo ro mga tawo sa ibabaw it eogta nga kon magta-ob hay ro mga hayop sa dagat hay naga winarang ag abo man nga mga tanum ro naga kasamad sa andang pagkinaon. Isaea guid ro alimango nga naga kagutay-gutay ro mga tanum kon hi-agyan ko anang mga kamaeos.

Guin patawag si alimango agod mag sabat sa pabangod kana. "Ano abi ay kakon guin pasa ro mga bueawan nga guina takaw it mga isda nga sugo it mga syokoy ag serena", sabat it alimango. "Sa ano guina gamita ro bueawan?" may kahangawa nga pangutana it hari.

"Agod obrahon nga korona it prinsesa, kaibahan ko mga perlas nga una man makit-an sa idaeum it dagat", dueongan nga sabat it mga isda. Guin pangutana pa guid ro alimango kon ham-an it imaw ro naga daea. Suno kana, guina akigan imaw it prinsesa kon indi magtuman.

Umpisa kato, guin bawae eon ko hari ro tanan nga hayop sa kadagatan nga mag-adto sa takas ano mang oras ag adlaw. Guin butangan nana it tanda para indi malipatan ro anang kasuguan. Pag nagbueak ro tanum nga Dap-dap sa kilid it suba, owa it maka saka nga hayop sa ibabaw. Samtang sige mat-a nga dinaea it bueawan ko alimango idto sa Prinsesa. Kon magbueak ro dapdap sigurado nga may daea eon man nga bueawan ro alimango. Imaw ro alige nga guina daea nana. Agud indi imaw masayran, idto imaw naga panago sa anang buho, hasta nga matapos nana it bo-bo ro bueawn sa Prinsesa. Bilang pasaeamat kana it Prinsesa, guin taw-an imaw it kagat agod anang armas kon may naga away kana. /MP

No comments: