Tita Linda Belayro
Tierra Del Fuego
Katong tiyempo it mga Kastila, iya sa Pilipinas hay may isaeang ka isla nga kon tawgon hay Tierra del Fuego. Rikara guina daea ro mga criminal nga mabug-at it kasae-anan.
Suno sa gobiyerno, kanugon kuno ro guina paka-on kanda sa presuhan busa, guina daea sanda sa rondayang isla ag idto guina patay. Kun indi man hay guina eobong it buhi.
Isaea si Biting nga paga daehon sa rondayang isla. Guina huyap imaw nga kriminal tongod sa pag depensa nana sa anang kaugalingon sa pagpatay it isaeang ka guardiya civil. Si Biting hay duro guid it hasayran nga abilidad. Isaea eon sa abilidad nana hay kon paalin ro indi mag ginhawa it mabuhay. Abo man ro anang naimbento nga mga bagay busa, bukon it problema kay Biting ro mag istar idto sa isla.
Ko agahon ngaron, naghibilin imaw sa anang kaibahang preso nga ipangayo imaw it patawad sa anang pamilya kon ano man ro anang nahimong mga kasae anan. Sigurado abi sanda nga owa eon it tsansa nga maka balik it buhi kon idto eon daehon sandang preso sa isla. Kat guina daea eon sanda sakay sa barko, guin pahiran nana it bawang ro anang boli. Kat idto eon sanda sa barko, nagpakuno-kuno imaw nga naga kurog ag naga buea ro baba. Guin paeapitan imaw it mga preso. Andang ha pulsohan nga sobra ro anang kainit ag owa eon naga ginhawa. Nagmando ro mga guardiya nga puston it haboe ag itapok sa tubi. Nagpadayon sa pag eayag ro barko hasta nakaabot sa isla. Nagpahuway anay sanda ag nag eaha it pagkaon.
Samtang naka paibabaw eon mat-a sa tubi si Biting ag nag eangoy paadto sa pangpang. Nagkamang imaw paagto sa mga preso. Pagkakita nana sa mga guardiya, guin pang eampusan nana hasta hapatay nana sanda. Guin tipon dayon nana ro mga preso ag nagkasugot kon ano ro andang himuon.
Pagkaaga, guin libot nanda ro isla. Abo nga mga prutas ag mga itlog it pispis ro andang hakita. May hakita pa sanda nga ba-oe nga puno it mga igdaeapat pang eaha. Nag obra sanda it payag ag guin hawanan ro isla. Abo man nga mga isda ro dagat, ngani owa it gutom una kanda.
Tumaliwan ro mga binuean, sadyaan eon ro isla matsa paraiso. Abo ro naimbento ni Biting. Nag obra man sanda it asin. Nag obra it baesa agod maka tabok sa pihak nga isla agod ibaligya ro andang asin. Naka bakae man sanda it maisot nga radyo nga imaw ro andang guina kalingaw-lingawan.
Isaeang adlaw, may barko nga nag dungka sa isla. Raya hay negosyante nga nangayo it permiso sa gobyerno agod mag patindog it pabrika. Pagkakita nanda sa isla, duro ro andang kangawa tongod indi eon angay nga tawgon nga lugar it mga criminal.
Guin dayaw nanda ro guin obra ni Biting ag nag promesa nga buligan pa sanda agod ma umwad pa guid ro isla nga mangin tourist attraction. Guin daehan it TV crew idto sa isla ag guin interview si Biting. Guin ako nana ro anang guin obra. Ag tongod sa anang pagpasadya, guin pasensya imaw it gobyerno. Pagkasayod ko anang pamilya, nag-adto sanda idto sa isla ag idto nag-estar. Halin kato, bukon eon it Tierra del Fuego ro tawag sa isla kundi Isla Verde. /MP
No comments:
Post a Comment