Sugilanon Ni Tita Linda

Tita Linda Belayro

Magic Galingan

Ro mga dwende hay bu-ot nanda mag kaon it hamon. Naga pati abi sanda nga naga padugang sa andang kabuhi kon maka kaon sanda it hamon.

Maeapit eon lang ro paskwa. Ko agahon ngaron, nagdaea it kahoy nga panggatong si Frank idto sa banwa agod ibaligya. Ro kabakeonan hay ibakae it pang Noche Buena. Ro anang kabakeanan sa kahoy hay anang guin bakae it sangka hita nga hamon. Samtang naga pauli eon imaw, nahumgan it mga dwende ro guina pas-an nga hamon ni Frank. Matsa mga tagasaw nga nag pueokon sanda sa guina agyan ni Frank.

Nagpundo si Frank. Naghinyo ro andang pinaka lider it dwende nga bayluhan nanda it bueawan ro hamon ni Frank. Hadumduman nana ro istorya ko anang Lolo nga may unang daan nga galingan nga guina tago ro mga dwende. Rikara sanda naga bo-oe ko tanan nanda nga guina gamit adlaw-adlaw, pwera eamang ro hamon.

Rondaya ro guin pangayo ni Frank nga kabaylo it hamon. Ko una, indi nanda igtao ogaling ko ulihi tongod sa sobrang kaibog sa hamon, andang guin baylo ro galingan. Guin aeagawan ko mga dwende ro hamon.

Pag-abot sa baeay, guin samitan it pangayo sa galingan ni Frank ro andang mga kinahangeanon. Tongod sa galingan, nag manggaranon sanda. Owa eon si Frank naga pangahoy kundi naga negosyo eon lang.

Duro ro kangawa ko anang mga kaeapit baeay kon siin si Frank nag bo-oe ko anang manggad. Andang guin manmanan. Hasayran nga halin gali sa galingan. Guin takaw nanda ro galingan ag guin daea idto sa isaeang ka kweba agod indi sanda makita. Nag pinangayo sanda sa galingan ag sa sobrang kahakog, owa nagpundo it pagginatong hasta hatabunan ro puertahan it mga bueawan.

Owa sanda maka guwa sa kweba ag idto sanda namatay kaibahan ko galingan nga hasta makaron hay, sige pa ro ginaling it bueawan. Imaw ro pagtunga ko bukid nga bueawan idto sa Paracale, Bicol nga siin may mga maeagko nga minahan it bueawan.

"Ro kahakog it tawo sa manggad o material nga bagay hay naga daea kana sa kaeainan." /MP