Wednesday, December 30, 2009

Sugilanon Ni Tita Linda


Ni Tita Linda Belayro
Pyramus Ag Thisbe
Natabo rondayang estorya sa dumaang Babylonia hanungod sa daywang ka magka gugma nga sanday Pyramus ag Thisbe. Kontra guid ko andang mga ginikanan nga sanda hay mag padayon sa pag asawa. Ogaling sekreto sandang daywa nga naga estorya ag magkasugot paagi sa isaeang ka gabot sa pader. Owa pa kato it CP.

Bawae kay Pyramus nga mag bisita kay Thisbe. Ro pader ngato hay naga sirbing paminit sa baeay ni Pyranus ag Thisbe. Rato ro naga tunga sa andang baeay.

Ko olihi, nag kasugot sanda nga magkita sa liwan it siyudad. Ko gabii ngaron, una sanda mag hueoeatan sa puno it Narrang kahoy. Hauna nga nag abot si Thisbe. Ogaling may isaeang ka babaye nga lion nga umabot halin sa pagkinaon it isaeang ka karnero. Nag adto ro lion sa isaeang ka sapa agod mag inom it tubi. Hinadlukan si Thisbe. Busa, nag dinaeagan ro daeaga sa kahadlok. Sa pagdinaeagan, nahueog ro anang alampay. Hakita ra it lion ag guin gus-ab, busa napuno it dugo, gisi pa.

Nag-abot man dayon si Pyramus. Hakita nana ro alampay ni Thisbe nga gutay-gutay eon ag puno it dugo. Sa pagpati nga guin kaon it lion ro daeaga, guin bo-oe nana ro alampay ag guin sab-eay sa kahoy nga mulberry. Guin bo-oe man nana ro anang espada ag dayon guin buno ro anang kaugalingon.

Pagbalik ni Thisbe, hakita nana ro natabo. Guin buno na man ro anang dogalingon.

Halin kato, nangin itum ro dating bungang puti it mulberry tungod sa dugo, it daywang ka mag higugma. Owa sanda naka angkon it katigayonan iya sa ibabaw it eogta sa andang paghigugma. /MP

No comments: