Sugilanon Ni Tita Linda

Tita Linda Belayro

Prinsesa Naranja

My isaeang ka baeong hari. Ogaling, nag-asawa imaw it uman. Ko una hay mabuot ra maw sa onga nga Prinsesa, ogaling ko ulihi hay nagkahikaw imaw sa Prinsesa tongod palangga guid abi imaw it hari.

Ko olihi, guin sampit nana ro Prinsesa nga maligos sa bubon una sa liwan it palasyo. Pag-abot nanda sa bubon, guin sabyahan nana it tubi nga may magic potion ag guin sueod nana ro prinsesa sa isaeang ka suwa ag ihueog sa bubon. Owa guid it nakasayod sa natabo. Ro pag eaum it hari hay una eamang ro Prinsesa sa anang sueod o kundi sa paboritong hardin sa sueod it palasyo.

Isaeang adlaw, may isaeang ka prinsipe nga nagpundo sa bubon agod pa imnon it tubi ro anang kabayo. Hakita nana ro mahayag nga suwa nga naga eotaw eotaw sa bubon. Anang guin timba ag daehon sa ibabaw. Tongod masyadong init ro paniempo, bu-ot nana nga upakan ag kan-on ro suwa.

Kat ana eon nga guina upakan it kutsilyo hay nakabati imaw it pamisaea. "Dahan-dahan, basi maninahan", habatian nanang limog sa sueod it suwa. Guin gamitan eon lang nana it alima hasta natapos ro pag upak. Sa anang pagbuka, may tawo imaw nga hakita ag gumuwa. Isaeang ka prinsesa nga maisot, si Prinsesa Naranja. Guin daea nana sa anang palasyo ag guin tago sa anang kwarto. Naeo-oy guid ro prinsipe sa hadangatan it prinsesa, busa nangutana imaw kon paalin mapabalik ro prinsesa sa dating dagway.
"Daehon mo ro kaldero nga guin eaha-an it magic potion. Magpakuno-kuno ka nga ga bakae o naga baylo it eaging kaldero," hambae it Prinsesa.

Ko agahon ngaron, nag-adto sa palasyo ro prinsipe agod magbaylo it mga samad nga kaldero. Owa it suko-suko ag dali-dali nga guin baligya ko reyna ro ana ngatong kaldero. Nag uli sa andang palasyo ro prinsipe. Guin sugo imaw nga butangan it tubi ro kaldero ag butangan it upak it suwa ag pabay-an imaw sa sueod it kaldero. Guin tuman it prinsipe.

Pagkaaga, bangod sa kaga-oy ko prinsipe, adlaw eon imaw mag bugtaw. Hakibot imaw nga puno it pagkaon ro lamesa. May hakita imaw nga tawo sa kusina nga naka biste it kamiseta ag saewae. Pag-balikid it tawo, owa it iba kundi si Prinsesa Naranja nga naka biste it eambong it prinsipe tongod ro anang eambong hay maistan eot-a. Naghi-nibayag sanda nga daywa.

Guin kasae sanda ko olihi. Sa owa magbuhay, nagbakasyon ro Reyna. Nalipay guid it duro ro hari. Guin suguid ko prinsesa sa hari ro natabo. Nag pamoeagsa ro Reyna, ro pangaywang asawa. Tongod sa anang pagdinaeagan, nahueog imaw sa isaeang ka kantil ag namatay. /MP