Sugilanon Ni Tita Linda

Ni Tita Linda Belayro

Puersa it Paghigugma

Sa kaharian it mga Unano ag Engkanto, guina paabot ag gina abi-abi gid ro bag-ong dag-on tongod sayod sanda nga paga taw-an sanda it andang mga hinyo. Ro andang hari hay naga ta-o kon ano ro andang pangayo kada bag-ong dag-on.

Isaea eon si Amihan, sangka engkantada nga naga higugma it putli sa isaeang ka mortal nga si Ramiro. Owa nakasayod si Ramiro ko pagkatawo ni Amihan. Ro anang pagkakilaea hay taga ibang baryo eamang ro daeaga. Sangka babaye nga naga pang eaba sa suba nga andang guina kita-an adlaw-adlaw.

Pilang adlaw, parabil mag-abot ro bisperas it bag-ong dag-on, nag eaong si Amihan kay Ramiro nga indi anay sanda magkita it mga pilang adlaw tongod maga-bakasyon imaw sa anang igbata sa ibang lugar.

Bisperas pa eang, naga linya eon ro mga babaye ag eaeaki sa atubang it tulay. Tanan nga may pangayo kinahangean nga magtabok sa tulay. Sa idaeum, naga bukae ro mainit nga tubi ag kon indi ro sangka tawo maka tabok hay masunog imaw sa kainit. Ogaling kon makatabok imaw, may premyo imaw nga diamante ag matupad kon ano man ro anang pangayo.

Parabil magtapak si Amihan sa tulay, guin pahaum nana ro anang kaugalingon sa ngaean it paghigugma. Sa pag-tikang nana sa ibabaw it tulay, nag umpisa it init ro bukae it tubi, ogaling owa nana habatyagi. Paghigugma ro sueod ko anang paino-ino ag tagipusuon. Hasta naka-abot imaw sa tabok, sa anang paino-ino hay si Ramiro eamang.

Tongod sa kainit, nagkaeasunog ro anang bilog nga eawas ag imaw hay natumba. Pagbugtaw nana, una sa anang atubadngan ro hari ag reyna. Guin dawat kana ro brilyante ag guin banyusan imaw it mga dahon agod mabo-oe ro mga sunog sa anang eawas. Kat nakabalik eon ro anang kusog, guin adwing nana ro anang mga kaibahan. Nagkaway ro tanan sa anang kadaeag-an. Isaea eon imaw ka mortal ag indi eon makabalik sa anang kalibutan, ogaling sayod imaw nga naga hueat kana si Ramiro. /MP