Tita Linda Belayro
Ukay-ukay Ni Rina
Halin sa pagka pobre nga pamilya si Rina. Ogaling kaparehas ko ibang dalagita, nailaan nana ro pag eambong it sadyaan. Bisan guina kueang ro anang guinikanan sa kwarta, naga tingoha guid maski hasta eon lang imaw sa ukay-ukay. Ilo sa ama si Rina. Modesta ro anang ina, busa sadyaan ro mga eambong ni Rina.
Isaeang adlaw, may nagpa togaebo kanda it eambong, isaeang ka babaye. Bu-ot nana nga umanon ro eambong ag iplastar para sa anang matambok nga eawas. Tama man nga may eagnat ko mga oras ngaron ro anang ina, busa imaw ro nagtas-tas ko eambong.
Samtang guina tastas ni Rina ro pading sa abaga, hapan-uhan nana ro matig-a ag naga baeo-eon sa sueod it pading. Sa anang pagtas-tas, hakita nana ro mga binaeo-eon nga dolyar Amerikano. Guin pakita nana sa anang ina ro kwarta. Hakibot guid it duro ro anang ina. Pagka gabi-i ngaron, guin hambaean nanda kon ano ro andang himuon sa kwarta.
Agahon pa nagbalik ro tag ana nga mag hinyo nga indi ibalik ro pading. Tongod nga mabuot ro mag-ina, guin uli nanda ro dolyar sa babaye. Nalipay guid it abu ro babaye tongod owa guid imaw magsaea sa anang pagpili. Ro babaye hay isaeang ka biyuda man ag owa it onga. Imaw raya ro anang guina obra kada dag-on kon mag-abot ro paskwa. Bu-ot nana nga samitan ro mga tawo kon baea sanda hay anang masaligan ag owa naga hupot it kaibug ko bukon it anda. Guin tao nana ro dolyar sa mag-ina ag nagpabilin pa ko anang tarheta kon siin imaw makita ingkaso may bu-ot kinahangeanon si Rina.
Nagbakae ro mag-ina it bag-ong makina nga de-kuryente. Nag-abo man ro andang mga parokyano tongod idto kanda guina turo ko biyuda ro anang mga amiga. Nagpatindog dayon it boutique sanday Rina. Nangin popular ro Rina’s Botique sa andang lugar. Maskin nag asenso eon , owa guid magbalhin ro andang pamatasan.
Sige andang bulig sa mga pobre tongod naga pati sanda nga dapat man hueayan ro mga kubos sa grasya nga guinta-o kanda. /MP
No comments:
Post a Comment