Sugilanon Ni Tita Linda

Ni Tita Linda Belayro

Guindalian Nga Kamatayon

Indi mahamtang si Jinky ko mga oras ngato samtang naga bunyag imaw it tanum. Owa it mga tawo sa anang palibot ogaling mingko may naga bantay kana. Guin butang nana ro anang tabo ag nag pungko sa semento nga poeongkuan.

Pagtangda nana sa pihak nga baeay, may hakita imaw nga alima nga naga paypay ag bag-o eamang nga naduea nga oeo. Guin tueok nana it mayad basi namalik-mata eamang imaw. Owa man nana makita it uman.
Pagkaaga, samtang naga bakae imaw it mantika sa baraka, nagkita sanda ko soeogo-on it baeay nga kon siin nag paypay kana ro alima. Guin pangutana nana kon sin-o ro babaye sa ikatatlong panaygan ko baeay. Nang eamig si Jinky kat masayran nana nga patay eot-a gli ratong babaye nga ina ko eaeaking tag-ana.

Tongod sa owa rona ro mag-asawa, guin buksan nanda ro kwarto. Hakita nanda ro abong bueak nga naga kalhit. Ro iba hay eab-as pa ag ro iba hay ea-ay eon. Hangawa man ro soeogo-on. Guin palimpyohan kana ro tanan nga parte it sueod ag guin bawaean ro pagsueod sa kwarto.

Ko gabii ngaron, nag-damgo si Jinky. Nagpakita kana ro magueang nga may daeang mga bueak nga guin patanum sa isaeang ka lugar. Pagkaaga, kat owa eon ro mag asawa, nag-adto sanday Jinky sa guin turo nga lugar it magueang agod magtanum it mga bueak. Sa andang pagkut-kot, may hakita sanda nga bote it hilo. Suno sa sueogo-on, pilang adlaw eot-a nga naeobong ro magueang. Mahilig mag-pananum it bueak ro magueang, ogaling hakibot sanda nga patay eot-a ro magueang sa anang kwarto nga naga buea ag sa anang alima ro mga bueak nga anang guin pang kotoe.

Guin daea nanda sa taeatapan it pulisya ro bote. Tongod sa andang sugid, nag imbestigar ro mga kapulisan. Hadiskobrehan nga hilo ro kabangdanan ko kamatayon it magueang suno sa imbestigasyon. May mabahoe nga insurance ro magueang ag guina himakas ko mag asawa nga mabo-oe tongod abo ro andang kautangan. Naka dispalko it mabahoe nga hayga it kwarta ro eaeaki sa anang kompanya ag kinahangean nga maibalik eagi parabil madiskobrehan it tag-ana.

Kabuhi ko ina it eaeaki ro guin sakripisyo agod maeowas sa kautangan ag kasae-anan nga guin himo ko anang onga. Ogaling sa saea nga paagi. Ro isaeang kasae-anan hay indi maeobad it sambilog pa guid nga pagkasaea.
Mangin leksyon ron-dayang suguilanon sa mga naga buyot it kwarta sa pribado o gobyerno man nga taeatapan. Magkabuhi kita suno sa atong guina kita. Ro magarbo ag naga kahikaw nga pag-pangabuhi nga kon ano ro hueag ko atong kaeapit-baeay hay aton man nga topongan o eabawan pa guid. Imaw ra ro naga tueod sa tawo nga mag mitir, magpanakaw ko kwarta nga bukon it anda, matustusan eamang ro kapritso ko andang kaugalingon o ko andang pamilya. /MP