Sugilanon Ni Tita Linda

Ni Tita Linda Belayro

Sobra Pa Sa Manggad

Adlaw nga Domingo, agahon pa hay una eon si Mercedes sa kilid it simbahan it Quiapo agod magbaligya imaw it bueak it Sampaguita. Bu-ot nana nga makatipon it abo ag naga kaigo nga kwarta agod may anang baeonon adlaw-adlaw. Ro iba hay ibakae it bueong para sa anang naga masakit nga Lola.

Isaeang adlaw, samtang naga hueat si Mercedes it manog bakae, may pumundo nga saeakyan. Pagbukas it pwertahan, nanaog ro isaeang ka eaeaki. Nagdaeagan si Mercedes paadto kana agod baligyaan it Sampaguita ro eaeaki. Matsa guin higop ro anang mata sa onga. Matsa may naga hutik kana nga magbakae it Sampaguita. Nagbo-oe imaw it sang libo nga pesos sa anang kahita. Binakae nana tanan it Sampaguita. Duro guid ro kaila ni Mercedes, kapin pa ay guin hatod imaw ko eaeaki sa andang baeay sakay sa kotse. Nagpakilaea imaw sa ginikanan it onga nga imaw hay si Rodrigo Villar.

Hakibot ro mga magueang. Raya ro eaeaki nga nagloko sa andang onga nga si Consuelo. Inaywan nana ro daeagang naga nabdos. Nag-uli imaw sa Manila tongod sa guin atake sa tagipusuon ro anang ina. Umpisa kato hay owa eon it binati sa binata, kay Rodrigo.

Busa guin onga ni Consuelo si Lina nga owa hitun-e kon siin eon ro anang ama. Tongod sa perming naga kasubo si Consuelo, habugtawan eang ko anang ina nga owa eon it kabuhi imaw. Haaywan sa pagtatap ko magueang si Mercedes.

Umpisa man nga guin kasae sanday Rodrigo ag ro anang asawa, permi eang sanda nga naga inaway tongod indi maka onga ro babaye. Habatian eon lang nana nga nagmunot sa ibang eaeaki ra asawa daea ro kagamitan sa baeay. Owa eon abi naga inuli si Rodrigo ngani pagusto it himos ag daehon ro mga igdaeapat sa pamaeay.

Halin kato, guin inusoy ni Rodrigo si Consuelo. Sa pagbuot it Diyos, nagkita ro mag ama. Guin daea ni Rodrigo si Mercedes ag anang lola sa anang baeay. Hakita nana nga mahawan eot-a ro anang baeay. Sa anang sobrang kalipay, owa nana guin baliha ro nadueang kagamitan tongod sobra pa sa manggad nga nakita nana ro anang onga. /MP