Sugilanon Ni Tita Linda

Ni Tita Linda Belayro

Ro Bueak Nga Malvarosa

Solo nga onga ko datu si Rosa. Daeaga pa imaw, guin panamkon imaw sa isaeang ka bueak, busa mamuea-muea ro anang uyahon ag maputi ro anang pamanit. Abo nga naga dayaw sa kagwapa ko prinsesa. Abu ro mga sulterong naga handum kana. Owa guid imaw it nailaan.

May isaeang ka mangangahoy ro hakilaea ni Rosa. Rondaya hay si Malvar nga una man ngani naga estar sa liwan it palasyo. Permi si Rosa nga guina daehan it prutas ag bueak sa palasyo busa nahueog ro anang bu-ot sa binata. Pagtaliwan it pilang buean, hasayran ko datu ro relasyon it daywa. Owa naila ro datu sa binata tongod bukon it naghalin sa hari-anon nga pamilya. Agud boe-an it gana ro binata, guin taw-an nana ro mga naga pangasawa it malisod nga oeobrahon, ro pagdaea it puti nga rosas nga may pagtak nga puea sa datu.

Eagi-eagi guin libot ko mga binata ro sueod ag liwan it kaharian. Owa guid sanda it hakita nga bueak nga puting may pagtak nga puea. Sa kagaoy ni Malvar, nag pungko imaw idto sa paborito nga hardin it prinsesa. Bulahan guid imaw ay may hakita imaw nga puting rosas nga may pagtak nga puea.

Dali-dali nana nga guin kotoe ro bueak ag guin daea sa datu. Hakibot ro datu. Ana nga guin patawag ro prinsesa. Idto naga eobog ro prinsesa nga masyadong maeospad. Ro ana galing dugo hay imaw ro anang guina dilig sa mga puting bueak agod maga pagtak it puea.

Duro guid ro kasubo it datu. Na atas ro dugo it prinsesa. Parabil nabugto ro guinhawa it prinsesa, naghinyo imaw nga idto imaw e-eobong sa anang paboritong hardin. Tumaliwan ro daywang adlaw, hakita man ro patay nga eawas ni Malvar. Guin eobong man imaw sa kilid ko prinsesa. Tumaliwan ro pilang dominggo, may tumubo sa hardin nga tanum ag nagbueak it puting rosas nga may pagtak nga puea.
Halin kato, guin tawag nanda nga Malvarosa ro bueak simbolo ko putli ag hantup nga paghigugma ko daywang ka tinuga nga si Malvar ag Rosa. /MP