Sugilanon Ni Tita Linda

Ni Tita Linda Belayro

Pag-oean It Meteor

Paeangta eamang naga abot ro pag uean it meteor. Iya katon guina tawag rang bulalakaw ag ro matamaan kara hay naga kasunog ro andang panit, ag naga katoe ro bilog nga eawas. Ogaling sa planetang Ganemede, guina kahadlukan ro pag-oean it meteor. Suno kanda, naga amat-amat it katunaw ro andang planeta dueot ko pag abuso ko andang pomoeoyo.

Guina kinutkot nanda ro andang kabukiran sa pagmina it Uranium nga guina obrang kusog it mga makina para sa andang mga gamit pang guera. Iya sa atong planeta, taliwas man ro atong pagpati. Ro pag uean it meteor hay naga saad it bugana nga grasya nga maga abot sa tawo.

Mga sanggatos dag-on eon ro nagtaliwan kat ulihing nag uean it meteor sa planetang Ganemede. Tongod sa kabug-at ko mga bato nga nagtama iya sa atong kalibutan, dagaya ro nakapueot. Isaea eon si Garin. Isaea ra imaw ka panday busa, guin obra nana nga arado, saroe ag iba pang gamit sa panguma ratong anang hapueot.

Sa uwa magbuhay, isaeang gabii, samtang naga pahangin sa balkon si Garin, may hakita imaw nga mga mahayag nga nag eabay sa tunga it kadueom. Guin suoran nana ag anang hakita ro mga maintok nga tinuga nga may guina usoy. Pagkaaga, may hakita imaw nga sakayang panghangin nga naka eobong sa eogta.

Anang guin usisa ag hakita nana nga puno it instrumento nga naga angot sa ibang planeta. Nag aeabutan man ratong maintok nga mga tawo. Nagpakilaea sanda kay Garin nga sanda hay mga taga planetang Ganemede nga maeapit sa atong kalibutan. Naga usoy sanda it sarang maestaran kon mag eopok ro andang planeta, pahayag nanda.

Ro pag oean it meteor hay naga abot it kada sanggatos dag-on ag makaron maeagko eon ro bato nga naga katiphag sa andang planeta. Guin saysay nanda kon paano ro pag abuso ko mga tawo sa andang tunang manggad. Nagsabat man dayon si Garin nga sobra pa ngani karon ro guina inobra iya sa atong kalibutan. Hinadlukan ro mga taga Ganemede. Bukon man gali sanda it sigurado sa rondayang kalibutan.

Nagpasaeamat sanda kay Garin. Guin taw-an nanda it diamante si Garin nga naga siga-siga. Pagtaliwan ko mga taga Ganemede, nag paino-ino it madaeum si Garin. Makasarang baea kita it pag usoy it ibang planeta kon mawasak ro atong kalibutan? Hin-uno pa magbugtaw ro tawo? Tongod sa kasueok it manggad, owa naton na paino-inoha ro matabo. Maka eo-eo-oy ro ulihing henerasyon nga maabutan kon mawasak ro atong kalibutan. Sambilog man lang ro atong planetang guina estaran. /MP