Sugilanon Ni Tita Linda

Ni Tita Linda Belayro

Ro Lighthouse Sa New Washington

Sa sangka tawo nga maga adto sa Barangay Fatima, New Washington, Aklan, hay may anang makita nga "lighthouse" sa kilid it baybay. Rondaya ro naga giya sa mga bapor o ano man nga saeakyang dagat nga maabutan it gabi-i sa eawod maeapit sa rayang lighthouse. Rondaya man ro taeandaan ko mga mananagat kon sanda magpaea-ot, kon siin sanda nga dereksiyon naga padueong ag makauli man sanda nga indi magtaeang.

Kato anay nga unang tiyempo, owa pat-a rondayang lighthouse, ogaling una eon ro bukana nga pasueod sa dueongkaan it Dumaguit. May isaeang ka bapor nga taga ibang lugar nga nagtaeang tongod sa maeain pa ro tiyempo. Bu-ot nanda nga mag pabinit agod manilong eamang samtang maeain ro paniyempo.

Tungod sa kadueom, may hakita ro mga tripulante it bapor nga mabahoe nga sueo nga mingko naga pay-pay kanda. Guin paeapit nanda ro andang bapor ag naaninag nanda ro isaeang ka babaye nga naka eambong it puti nga mahaba ag naga buyot it sueo. Guina sampit sanda nga ipaeapit ro bapor. Sa anda nga pagsunod, tama guid lang nga naka sueod sanda sa bukana pasueod sa Dumaguit.

Nagpalipas sanda it gabii. Pagkaaga, guin usoy nanda ro babaye agod magpasaeamat. Sa andang pag pangutana, owa man it nakakilaea sa rondayang babaye sa lugar ngaron. Nag eapta ro balita sa bilog nga banwa.

Guin pakamayad nga patindugan it lighthouse sa lugar ngaron agod makabulig sa mga bapor nga naga agi runa ag imaw man sa mga mangingisda kon sanda magpa eawod. Nangin isaeang ka lugar nga bakasyunan ro nasambit nga lugar. May mga pamilya ag mga estudyante nga naga eskursyon man o magpamasyar eabi guid kon owa it klase o kon Dominggo nga adlaw. /MP