Ni Tita Linda Belayro
May Bueawan Sa Eogta Ag Basura
May daywang ka magmanghod, si Berto ag si Ambet. Parabil namatay ro andang ama hay may guinbilin imaw nga daywang ka bagay. Una, may bueawan imaw nga guin tago sa eogta ag bueawan man sa basurahan. Ro pamisaea ko andang ama hay guin huptan gid it mayad ni Ambet.
Pagkaeobong sa andang ama, nag umpisa eon it pagkutkot ro daywang ka mag manghod. Nag ukay man sanda it basura. Owa nakatakod sa kaga-oy si Berto busa, nagpanaw imaw sa ibang lugar agod magpasimpaead. Owa man abi imaw makakita it bueawan sa eogta, ni sa basura. Haaywan si Ambet.
Ro mga guin tumpok nanda nga eapok hay guin tamnan ni Ambet it kapaya, saging ag mga tinuean-on. Ana mang guin hawanan ro andang likod it baeay. Idto man nana guin tipon ro mga basura suno sa klase. Iba ro naga kaeonot, iba man ro uwa naga kaeonot.
Isaeang agahon, may nagpundo nga saeakyan sa andang atubang it baeay. Naga usoy gali it mga eaging igdaeapat, mga bote ag lata. Guin guwa ni Ambet ro anang tinipon ag guin baligya nana sa ratong tawo ro anang nga basura.
Ko gabii ngaron, nagdamgo si Ambet. Sa anang damgo, nagpakita ro anang ama nga naga hibayag ag malipayon. Naghambae kana ro anang ama. "May bueawan sa mga basura Ambet". Habugtaw si Ambet nga natuon ro anang mata sa kwarta nga kabak-eanan it mga basura.
Rondaya gali ro kwarta nga guina hambae ko anang ama. Tumaliwan ro sang dag-on. Hakita nana nga naga bunga eon ro anang mga kapaya, ag saging. Maeambo man ro anang mga tanum nga tinoean-on. Guin ani ag guin baligya nana sa tindahan ro mga prutas. Ro anang kabakeanan gali ro guina singhan nga bueawan nga guin bilin ko anang ama sa eogta ag sa basura.
Nag manggaranon si Ambet tongod sa anang kahugod sa paglimpyo it mga basura, pagtanum, pag ani it tinoean-on, ag prutas nga anang guina baligya adlaw-adlaw sa anang mga suki sa tindahan. /MP
No comments:
Post a Comment